‘Diego’ naghinamhinam nilang Anne, Jessy, Pilar

CEBU, Philippines - Hulagway gitampo Bag-o lang mitikang dinhi sa Sugbu sa unang higayon ang ikaduhang anak ni Pen Medina. Si Alex Vincent Medina, 24 anyos, aduna nay tulo ka entries sa Cinema One Originals Filmfest ug usa sa Cinemanila International Filmfest.

Bisan bag-ohay lang siyang misulbong sa telebisyon isip “Diego” sa Ina Kapatid Anak (ABS-CBN), isip barkada nga BI (bad influence) ngadto ni Enchong Dee, dili bag-o kang Alex ang pag-arte. Kini tungod kay daghan na sab siya’g workshops nga giapilan diin ang iyang amahan ang midumala. Nasayran sab nga artista sa entablado ang iyang inahan. Maguwang niya si Ping Medina, 29 anyos, nga suki na sab karon sa mga teleserye.

Nagtungha siya sa San Beda, mikuha sa kursong Marketing apan miundang ra sab. “Hindi ko kasi nagustuhan yung course ko. I want to act more,” niya pa.

Naghinamhinam siyang makaparehas sa iyang mga umaabot nga pelikula silang Anne Curtis ug Jessy Mendiola, ingon man ang Cebuanang si Pilar Pilapil. “Ang gagaling kasi nila. Lalo na si Miss Pilar, hindi pa rin siya kumukupas,” pahayag niya sa gihimong pakighinabi.

Angay kuno natong atangan ang mga lilas nga iyang gibidahan nga gisalmot sa film festival sama na lang sa “Palitan” (Cinema One) ubos sa direksyon ni Ato Bautista diin siya midaog isip Best Actor. “This is our tribute to Peque Gallaga’s “Scorpio Night” set in Raon St., Quiapo. Bale may mga maseselan akong eksena with Mara Lopez (anak sa kanhi sexy-star-turned-beauty-titlest Maria Isabel Lopez).”

Naa sab ang “Mariposa sa Hawla ng Gabi” kauban si Erich Gonzales. Usa kini ka sugilanon sa usa ka babaye nga buot mahimamat ang iyang igsoon nga nawagtang niadtong 1994; ingon man ang “Pascalina,” usa ka full-length film debut ni Pam Miras. Matawag kinig ‘aswang story’ diin bida ang bag-ong kaplag nga si Veronica Santiago. Samtang ang iyang entry alang sa Cinemanila nga “Supremo” nagbatbat sa kinabuhi ni Andres Bonifacio. Gidirehe kini ni Richard Somes (direktor sab sa Mariposa), gibitoonan ni Alfred Vargas isip Andres.

“Sa ‘Palitan’, boss ko si Mon Confiado at misis ko si Mara Lopez. We get involved in an erotic love triangle. Maraming sexy love scenes. In ‘Pascalina’, I’m the love interest of the lead, Veronica Santiago. ‘Mariposa’ is an action-thriller naman with Alfred Vargas and Mark Gil. I play the role of a bugaw. In ‘Supremo’, I play Procopio, the younger brother of Andres Bonifacio who was killed with him in Bundok Buntis,” padayag ni Alex.

Matod pa niya nga “biggest break” niya ang mamahimong kabahin sa Book 2 sa “Ina Kapatid Anak”.

“Being cast in a mainstream soap like ABS-CBN’s number one show, ‘Ina Kapatid Anak’, is really awesome,” matod pa niya. “Hindi ako makapaniwala nung una na isasama ko kina Eddie Gutierrez, Pilar Pilapil, Janice de Belen, Cherry Pie Picache, Kim Chiu, Maja Salvador, Enchong Dee and Xian Lim. May pressure talaga kasi galing nga ako sa indie films. But nag-warm up naman ako agad kasi very accommodating ang directors namin at ang bait ng buong cast sa’kin. They made me feel welcome,” saysay ni Alex.

Lakip sa una niyang natilawan atol sa iyang pag-istar dinhi sa Sugbu mao ang spicy lechon, nga mao sab ang dugay na niyang gihandom tungod kay gipasigarbo kinig maayo sa iyang kanhi high school teacher sa San Beda nga si Teacher Ray Nobleza. Si Teacher Ray maoy tag-iya sa Exceptional Children’s Educational Center dinha sa Talamban diin nahimong guest speaker si Alex atol sa Recognition and Graduation Day. (BANAT NEWS)