Balita sa Hugyaw Mahinayon Na!

CEBU, Philippines - Mga bag-ong dagway  na ang masaksihan sa  news program sa TV-5 Cebu   sugod karong Lunes sa hapon aron mohatud sa nag-unang mga balita sa  Sugbo ug sa ubang dapit sa Central Visayas.

Ang kasamtangang radio anchor sa Radyo 5 nga si Frank Malilong, Jr. ug Atty. Georgia Herrera  maoy mohulip nila ni Atty. Ruphil Bañoc ug Darlanne Sino-Cruz .

Ang news manager sa TV-5 nga si Rose Borromeo nisaysay dinhi sa Banat News Hugyaw (BNH) nga iyang mapasalig ngadto sa publiko nga mapadayon nila ni Malilong ug Herrera ang maayong nasugdan nila ni Bañoc ug Cruz.

Matud pa niya nga niadtong Oktubre pa sa miaging tuig nasulod sa ilang huna-huna nga maghulip og mga anchor gumikan kay kinahanglan ni Bañoc nga mo-focus isip manager sa dyHP sa Radio Mindanao Network ug maglisod kini og give-up sa nahisgutang radio station.

Samtang si Cruz nihangyo na sa miaging tuig nga mobiya sa Aksyon Bisaya gumikan kay mo-focus na siya sa iyang negosyo.

“Si Lanne, last year pa gyud na siya mobiya, pero akong nahangyo nga mo-extend aron magdungan na lang sila ni Atty. Ruphil,” matud pa ni Borromeo. Kagahapon sa hapon, gihimo na ang pagpaila-ila kang Malilong isip hulip ni Bañoc kinsa nakatampo usab sa kalampusan sa maong programa. Gipakita kagahapon ang mga video clip ni Bañoc ingon man usab ang welcome video alang kang Malilong.

Ang nahisgutang sitwasyon mao usab ang mahitabo karong hapon alang sa pormal nga pagpaila-ila kang Herrera isip bag-ong anchor dungan usab sa pagpanamilit ni Cruz.

Dugang pa ni Borromeo nga maayo ang dagan sa Aksyon  Bisaya ug dunay mga higayon nga naapsan niini ang Balitang Bisdak sa GMA-7. “Si Atty. Malilong kay dugay na sa industriya ug naka-marka na usab siya og pangalan, samtang si Atty. Georgia kay nakita namo ang iyang ka-sensiro sa trabaho bisan bag-o pa lang siya sa broadcasting ,” nagkanayon si Borromeo.

Mapaabot sa viewers ang pagpalapad og samot sa pag-presentar nila sa mga balita. Kahinumduman nga Nobyembre pa sa milabay nga tuig unang mibuto ang balita dinhi sa BNH ang kabahin sa paghulip ni Malilong kang Banoc. Nabalita pud dinhi sa BNH nga nagkasabot sila si Banoc ug Cruz nga humanon na lang nila ang 2012 o hangtud na lamang sila niadtong December 30.

Apan mga tinubdan sa BNH nagbansay-bansay pa sila si Malilong ug Herrera isip bag-ong news anchors sa nahisgutang programa, hinungdan nga wala dayon mapatuman ang mga unang plano.

Ang local newscast sa TV-5 nga  “Aksyon Bisaya”  nagsugod niadtong  Hulyo 18 , 2011  ug gikatigi niini ang  Balitang Bisdak sa GMA-7  ug TV Patrol sa ABS-CBN.

Samtang padayon nga madungog si Malilong sa programang  Frankahay Ta! sa Radyo 5 101.9 News FM.

Malantawan usab ang mga bag-ong anchor sa Aksyon Bisaya  karong Sabado sa alas kwatro (4p.m.) sa hapon diha sa  Parkmall, North Reclamation Project . Mohatag usab og kalingawan sa maong kalihukan ang TV 5 stars ug usa na niini mao si Eula Caballero nga bida sa “ Cassandra: Warrior Angel.