Alex ug Noli nagbungol?

CEBU, Philippines - Gikatahong mobalik  na si Alex Santos sa pagtrabaho sa news department sa ABS-CBN gumikan  kay naa pa diay siyay kontrata sa nahisgutang network busa dili dayon siya kabiya niini. Nitumaw ang mga hungihong nga nalantugi ni Alex si Noli de Castro. Giingong nagsugod kini sa dihang dunay kuwang nga impormasyon sa special report ni Alex apan nasakpan kini ni Noli.

Edu mitambag sa publiko

Gitambagan ni Edu Manzano ang katawhan nga  dili gyud basta-basta magpadala sa mga politiko ug mopili gyud og tarong nga kandidato karong piniliay. “You have to see who’s qualified, hindi porke mayaman, super guwapo o maganda,” tsika pa ni Edu ngadto sa PEP.

Kathryn nagtungha gihapon

Hapit na mahuman ni  Kathryn Bernardo ang high school pinaagi sa home school program sa Angelicum College. “Natapos ko na Physics at Filipino. Sa English last exam ko na last weekend. Ang pinoproblema ko na lang Social Studies and Math,” suma pa ni Kathryn.

Todo gasto

Gikatahong gigastohan og maayo sa Regal Films ang pelikulang  The Bride and the Lover nga gibidahan ni Lovi Poe. Karong Mayo 1 ang play date sa maong pelikula nga gilangkoban usab nila ni Paulo Avelino, ug Jennylyn Mercado.

Heart motabang sa kampanya

Nahuman ang tanang eksena sa naghinapos na nga serye sa GMA-7 nga  Forever busa makahatag na og oras si Heart Evangelista sa iyang kaugalingon ug gisaad niini nga mohatag usab siya og higayon sa pagtabang sa kampanya sa iyang uyab nga si  Chiz Escudero.

Igsuon ni Jessy mag-artista

Nipirma na og kontrata sa Viva Entertainment  ang maguwang ni Jessy Mendiola nga si Pam. Malipayon si Jessy sa gibuhat sa iyang ate gumikan susama na sila nga artista.

Ryan ganahan mag-dancer

Giangkon ni Ryan Agoncillo nga taud-taud niya nga gipangandoy nga mahimong dancer busa nihangyo siya sa production team sa programa niya nga Talentadong Pinoy nga hatagan siya panagsa og dance number.  Gusto usab niya nga makauban sa pagsayaw ang giidolo niya nga The Maneuvers.

Chariz  nabalaka sa career

Giangkon na gyud ni Chariz nga nagsabak siya.  Panghinaut ni Chariz nga hangpon gihapon siya sa publiko inigkahuman niya og panganak. Nabalaka si Chariz nga basin malaos ang iyang career.

Charice nahilom

Hilom lang ang kampo ni   Charice  kalabot sa mga tawong nangutana kung unsa ang kasamtangang  kasikas sa singer. Giingong kalit lang  nawad-an og break si Charice sukad nilutaw matud pa ang pagka-tomboy niini.

Melai nagparetoke?

Gidudahan nga napuno sa retoke ang dagway ni  Melai Cantiveros . Dili mohatag og komento si Melai kalabot sa maong intriga. (Sanden J. Anadia)