Trending sa Twitter Kris nikanta og Pusong Bato

CEBU, Philippines - Gumikan sa kasikat  sa Pusong Bato, gikanta kini mismo ni Kris Aquino sa programa niya nga "KrisTV” kagahapon ug giubanan siya mismo sa  composer sa maong awit nga si Renee "Alon" de la Rosa.

Nahimong trending sa Twitter ang pag-awit ni Kris niini. Giingong sikat na kaayo ang Pusong Bato ilabi na nga mao kini ang kantahon permi sa mga tawo sa videokehan.

Una na nga gipadayag ni Kris nga paborito sa iyang anak nga si Bimby ang Pusong Bato. Nahimo na usab kini nga paboritong kanta ni Presidente Noynoy Aquino human kanunay siya makadungog nga kantahon kini permi sa iyang pag-umangkon nga si Bimby.

Samtang ang composer nga si Renee nagpasalamat sa tanang nakauyon sa maong awit. Matud pa niya nga mga bata ang kasagaran sa nakauyon  sa  nahisgutang awit.

"Siguro dahil tinangkilik ng masa, pati ng bata. Nag-start sa YouTube ng 2010 noong nalaman ng Alpha Music na ako ang may likha ng kanta. Sabi nila Alon i-record natin tutal ikaw ang composer. Siguro sa awa ng Panginoon sa tagal ng paghihirap ko, sabi niya siguro Alon huwag kang mainip. Bago ka man mawala sa mundo bibigyan kita ng hit song," matud pa ni Renee atol sa programang Kris TV kagahapon.

Kandidata sa Bb. Pilipinas natsugi

Gikatahong natagak na sa kompetisyon ang usa ka kandidata  sa Binibining Pilipinas 2013 human nasuta nga naka-pose na kini niadto sa  men’s magazine.

Ang model-singer  nga si Theresa Fenger maoy natangtang sa listahan sa 50 ka mga kandidata sa maong indigay. Nailhan siya isip candidate number 35.

Wala pa mohatag og official statement ang  Binibining Pilipinas Charities, Inc. ug tataw nga ang pag-pose ni Theresa sa  2010 pictorial sa  FHM Philippines maoy rason niini. Gikatahong sakop siya sa girl group nga  Eurasia.

Aduna siya’y  screen name nga  Lana Roi ug nakauban niya sa hulagway ang uban nga mga sakop sa Eurasia.

Gihulipan si  Theresa ni KC Gonzales Cajandig isip bag-ong candidate No. 35. Kahinumduman  nga siya maoy nakadaug sa Century Tuna Superbods niadtong 2009.

Mitumaw usab ang taho nga matud pa nga boluntaryong ni-backout si Theresa sa dihang naabot kaniya ang report nga idi-disqualify siya gumikan sa hulagway niya sa FHM.

Nakaapil na si Theresa sa pre-pageant activities apan wala na siya’y mahimo gumikan kay ginadili sa Binibining Pilipinas ang pagdawat og mga kandidata nga ni-pose sa mga men’s magazine.

Nasayran nga dili lang si  Theresa ang labing una nga babaye nga na-disqualify sa nahisgutang indigay.

Na-disqualify pud niadtong  2009 ang model-TV host nga si Sandra Seifert gumikan kay naka-pose usab kini sa FHM.

Samtang  na-disqualify usab ang sexy actress nga si Juliana Palermo niadtong  2004 sa screening pa lang sa  Binibining Pilipinas gumikan kay gawas nga naka-pose siya sa FHM, aduna pud siya’y breast exposure sa pelikulang www.XXX.com.

Daghan ang naghinam-hinam sa Bb. Pilipinas karong tuiga gumikan kay dunay nangapil nga mga celebrities , kini sama sa  ABS-CBN talent nga si Pia Romero (Pia Wurtzbach, No. 15); StarStruck 3 Avenger nga si Rhea Nakpil (No. 43); ug kanhi mga hosts sa  Wil Time Bigtime nga sila si Cindy Miranda (No. 16) ug Imelda Schweighart (No. 45).