Penitensya

CEBU, Philippines - No red meat ko sukad Ash Wednesday hangtud karong Easter Sunday. It’s a personal sacrifice. Ug sa akong yutang natawhan sa Pilar Camotes ko mamalandong sugod karong adlawa hangtud na sa Domingo. I grew in the church. Sacristan mayor ko sa una gikan sa grade five hangtud second year high school. Ang Semana Santa maoy kalihukan sa simbahan nga labing gipaabot namong mga sacristan. Panahon kini aron mahaduol kami sa usa’g-usa, sanglit sa kumbento man kami mangatulog aron dili mi ma-late sa mga celebration sama sa misa sa Huwebes Santo nga mulahos na sa Last Supper ug vigil, Station of the Cross libot sa Poblacion sa buntag ug  Veneration of the Cross sa hapon sa Biyernes Santo, Pagbag-o sa Tubig ug Kalayo sa Sabado de Gloria ug sa Sugat sa nabanhaw nga Kristo ug sa iyang inahan nga si Maria pagka kadlawon sa Domingo. Tibuok semana naa ang among mga nawong sa simbahan, nanglimpyo sa mga gamit, magpasinaw sa tabernacle, ug magkat-on sa among gimbuhaton atol sa nagkadaiyang espesyal nga mga misa niining maong panahon.

Hinungdan, nga dili gyud nako batasan ang maglingaw-lingaw adto sa mga dapit bakasyunan niining maong balaan nga semana. Matag tuig I look forward nga makapauli sa Camotes, sanglit didto mas mabatyagan nako ang tinuod nga kahulugan niining maong panahon---pamalandong, paghinulsol, ug subling pagdawat sa Ginoo diha sa atong kinabuhi, human mahugasan sa atong mga sala pinaagi sa kumpisal. Pero I have nothing against sa uban nga mubakasyon ngadto sa nagkadaiyang baybayon ug kabukiran aron magpahayahay. After all, faith is very personal. Siguro sa ilang paglulinghayaw, aduna silay igahin nga panahon aron mamalandong ug maduyog diha sa mga kasakit ni Hesukristo.

Managlahi kita og pamaagi sa pagpamalandong ug penitensya niining semana santa. Si Miss Press Freedom ug business reporter sa The Freeman Grace Lacamiento naghisgot kagahapon nga mag-deactivate siya sa iyang facebook account sugod karong adlawa isip penitensya. Ako dili na kinahanglan mag-deactivate sanglit naguba ang battery sa akong internet phone ug sunod semana pa kuno muabot ang akong gi-order nga replacement  busa tataw nga dili ko igkita sa nagkadaiyang social networking sites karong panahona. Walay picture-picture, tataw nga puasa!

My dear okRYANians, kun unsa man gani inyong plano karong panahona manghinaot ko nga makaangkon kamo og makahuluganon nga pamalandong ug mabanhaw kamo pag-usab---wala nay mga kasakit ug kabalaka nga bation, kundili usa na ka positibo ang panlantaw ang inyong mabatunan, dungan sa pagkabanhaw ni Hesukristo karong Domingo. Amping! (BANAT NEWS)