Claudine kinumpirmang babalik sa Kapamilya

PIK: Kaya pala lalong gumanda ang katawan ngayon ni Mark Bautista dahil pinaghahandaan nito ang bagong musical play niyang The Full Monty kasama sina Arnell Ignacio, Marco Sison, Jaime Wilson, OJ Mariano, at Niño Alejandro.

Medyo daring siya rito na kailangan niyang maghubad kaya dapat maganda ang katawan. Naka­handa naman ang machong singer na magpaka-daring dahil meron nang nag-aalok sa kanya ng indie films na kaila­ngang maghubad. Pero gusto niya sana matinong project talaga na maipagmalaki niya.

Nang tinanong na­min kay Mark ang love life, napangiti ito nang nabanggit namin si Gwendolyn Ruais na dating na-link sa kanya. Mas gusto raw niyang tahimik na lang pagdating kay Gwendolyn.

PAK: Namataan naman namin nung isang araw sa SM-Mall of Asia ang dating Ms. World first runner-up na si Gwendolyn Ruais sa press launch ng bagong scent ng Bench na XoXo at Oh My George na ini-endorse ni Georgina Wilson.

Nandun pala siya dahil kasali sa show ang Seme­rad twins na sina Anthony at David.

Hindi man deretsahang inamin ni Gwendolyn pero halata sa mga sagot nito na merong namamagitan sa kanila ni David Semerad.

Pagkatapos ng show, namataan namin sa bandang backstage si Gwen na nilapitan ito ng kambal. Humalik sa kanya si David. Natawa na lang siya nang nakita niyang nakatingin kami sa kanya.

Napangiti na lang ito nang tinanong namin kung siya nga ba ang nagbibigay ng inspirasyon kay David Semerad.

’Yung sa kanila raw ni Mark Bautista ay magkaibigan lang talaga sila hanggang ngayon at hindi sila na-link romantically.

BOOM: Marami ang tumawag sa Startalk nang lumabas ang huling interview ng naturang talk show sa anak ni Bella Flores na si Ruby Rose Arcilla.

 Mahigit sampung araw na nga ito sa hospital at hanggang ngayon ay wala pa ring improvement sa kalagayan ng beteranang aktres.

Wala pa rin daw itong malay at hindi nagri-respond kapag kinakausap mo.

 Isa sa tumawag sa amin nung nakaraang Sabado, pagkatapos ito napanood sa Startalk ay si Claudine Barretto.

Gusto raw nila ni Raymart Santiago magpadala ng tulong kay Tita Bella kaya hiningi sa amin ang contact number ni Ruby.    

Ayaw na lang ni Claudine na ibalita pa namin ang pagbigay nila ng tulong.

Pero natuwa naman kami sa ibinalita sa aming babalik na raw siya ng ABS-CBN 2.

Ayaw lang niya ikuwento sa amin ang buong detalye at hintayin na lang daw namin ang announcement.