Dakong kalampusan ni June

CEBU, Philippines - Giangkon ni 2012 Mr. Manhunt International June Macasaet atol sa presscon diha sa Diamond Suites and Residences niining bag-o lamang nga dili basta-basta ang pag-apil sa prestihiyosong male pageant tungod kay tigiay na kung tigiay ang show niini. Si June ang labing unang Pinoy nga nakadaug sa maong indigay sud sa 18 na ka tuig nga pagsalmot sa Pilipinas. Naangkon usab niya ang New Urban Male special award. Kutob lamang sa Top 15 ang naabot sa ubang nanglabay’ng mga pambato sa ‘Pinas nga ang barog dili momenos sa 5’11.” Niadtong 1997 lang medyo duol sa kalamposan ang Pilipinas dihang na 2nd runner-up si Vince Pinto.

Dugang pa ni June nga dako ang pagsuway nga angayng labangon sa Mr. Manhunt International tungod sa kalapad sa mga rekisitos niini. Mahimong mosalmot sa Manhunt ang 18 hangtod 30 anyos nga lalaki nga pwedeng minyo o dili. Buot pasabot nga mas sinati na sa natad sa modeling ang iyang mga kaatbang. Lapad ug daghan ang kategoriya nga sagubangon sa maong contest sama sa catwalk, image modeling, ramp modeling, ug ang pagtubag sa question and answer. 

Matud pa sa website sa Manhunt nga nakamugna’g kasaysayan ang pagdaug ni June isip first Filipino Manhunt tungod kay sagad nga makadaug sa maong kompetisyon, kun dili Amerikano, Latino, Europeano, o ba kaha Scandinavian ang manghawod.

Gawas sa paghatag og dungog sa nasud, busy na usab karon si June sa iyang modeling assignments as a prize sa iyang pagdaug. Liboton niya ang tibuok kalibutan alang sa iyang mga proyekto. Nagbaha usab ang mga endorsement offers sa Pinoy pride, lakip na niini ang nag-ung-ong nga kontrata isip Male Face of New Placenta, ang men’s beauty and skincare line sa Psalmstre Enterprises Incorporated nga gipanag-iya sa batan-ong negosyante nga si Jim Acosta.

Suod nga managhigala sila si June ug Jim. Gani, si June ang konsorte ni 2012 Ms. Earth-Air ug newest Face of New Placenta Stephany Stefanowitz sa pagsakay niini sa cherry blossoms float sa Psalmstre sa miaging Sinulog. Subling masaksihan ang duruha karong Pebrero sa Panagbenga Festival sa Baguio.

Dalaygon kaayo si June tungod kay simple ug game gihapon siya bisan pa man sa iyang taas nga kadaugan ug nagpabilin gihapon siyang darling of the press and crowd. Aduna na ba’y palarang binuhat nga nakasakmit sa kasing-kasing sa usa ka Mr. Manhunt International? “Yes, I have a girlfriend, who is now based in Dubai,” pag-angkon sa sex-appeal-oozing nga ulitawo.