Beyonce gihangop sa Super Bowl
CEBU, Philippines - Mibawi gyud ang sikat nga singer nga si Beyonce sa bag-ohay lang nga Super Bowl human sa kontrobersiyal niya nga pag-lip synch sa "Star-Spangled Banner" sa inagurasyon ni US President Barack Obama.
Ang halftime show ni Beyonce maoy giisip nga "finest moment" sa Super Bowl XLVII karong tuiga. Gipangandaman pag-ayo ni Beyonce ang maong kalihukan ug gikanta niya kini nga live.
Gisugdan sa singer ang iyang medley performance sa hit song niya nga "Crazy In Love," nga gisundan usab sa "Baby Boy," "Love on Top" ug "End of Time". Daghan usab ang nahugyaw sa iyang performance sa dihang giubanan niya sa entablado ang kanhi niya grupo nga Destiny's Child nga gilangkoban nila ni Michelle Williams ug Kelly Rowland.
Gikanta nila ang "Bootylicious," "Independent Woman" "Single Ladies" ug "Halo." Niabiba pag-ayo kang Beyonce ang audience sa iyang electrifying performance nga napuno sa fire, ice ug smoke effects.
Ang halftime show maoy usa sa highlight sa Super Bowl ug kung kahinumduman sa miaging tuig, moabot sa kapin sa 3 million viewers ang nilantaw sa halftime show sa Queen of Pop nga si Madonna.
Nasayran nga libre lang ang pag-perform ni Beyonce sa Super Bowl sanglit ang dakong audience share maoy makapakusog sa music sales sa usa ka performer. Pipila sa mga naka-perform sa mga nangagi nga Super Bowl mao sila si Ella Fitzgerald, Andy Williams, The Rolling Stones, Prince, The Who, Gloria Estefan, Justin Timberlake ug Janet Jackson.
- Latest
