Marian sinuway ang bilin ng doktor

Ayaw magpahinga ni Marian Rivera­ kahit sinabi ng doctor na tumingin sa kanyang magpahinga siya after atakihin ng matinding pananakit ng ulo sa taping ng Temptation of Wife. Isang araw lang nag-rest ang aktres dahil last Wednesday, nag-report na siya sa taping ng hit teleserye ng GMA 7.

Noong Thursday evening, dumalo siya sa celebration ng 150th edition ng FHM sa Republiq sa New Resorts World sa Pasay City. Si Marian ang cover ng men’s magazine na ang autograph-signing session niya ang may pinakamaraming dumating.

This Saturday, magre-resume sila ng shooting ni Richard Gutierrez para sa pelikulang My Lady Boss. Mabuti na lang at naurong sa March ang playdate ng Regal Entertainment, Inc. at GMA Films movie kaya hindi mangangarag ang dalawa na tapusin ang pelikula.

Sabi ni Annette Gozon-Abrogar, maganda na naurong ang playdate dahil mas mapapaganda ng husto ni Direk Jade Castro lalo na ang editing. May love scene raw dito sina Richard at Marian.

Derek at Nadine nag-aamoyan na lang, Cristine idinenay na rin ng aktor

“Getting to know each other” ang status nina Derek Ramsay at Nadine Samonte na nabuo sa taping ng Kidlat. Hindi nila minamadali kung saan hahantong at kung kailan mababago sa pagiging couple ang status nila. Sa ngayon, ini-enjoy ng dala­wa ang special friendship nila.

Nangako ang dalawa na aaminin din kapag naging sila na pero matatagalan ang kanilang pag-amin dahil sabi ng dalawa’y wala pang ligawang nangyayari sa kanila. So, nagpapakiramdaman pa lang siguro ang dalawa.

Itinanggi nina Derek at Nadine na tumatakas sila sa taping para mag-lunch o mag- dinner dahil nagpapaalam sila kay Direk Mike Tuviera at may kasama sila ’pag kumakain.

“Para namang high school ang tumatakas,” reaction ni Nadine.

Marami ang kinikilig sa tambalan nina Derek at Nadine sa Kidlat kaya sila na raw ang gagawing magkapareha sa halip na sina Derek at Ritz Azul. Pansin nga naman mas may electricity sina Derek at Nadine pero careful ang dalaga’t may mga nali-link na iba sa hunk actor.

Pero itinanggi na ni Derek sina Alexa Amos at Cristine Reyes at may iba namang nanliligaw kay Nadine. In fact, darating kundi this month ay sa March ang German-American niyang suitor dahil sasali yata sa MMA o Mixed Martial Arts.

May papasok na bagong karakter sa Kidlat, ang commercial at ramp model na si Valerie Weigmann at mai-involve rin kay Derek ang kanyang karakter. Paano na kung ma-link din si Derek kay Valerie?

Pancho hanggang crush lang kay Max, pero ayaw ligawan

Crush ni Pancho Magno ng GMA Artist Center si Max Collins pero nga­yon lang malalaman ng dalaga ’pag kanyang nabasa. Hindi pa magkakilala ng personal ang dalawa. “Hi” at “hello” lang ang batian nila ’pag nagkakasalubong sa GMA Network.

Gandang-gandang si Pancho kay Max at magaling ding artista, batay sa napapanood niya sa Pahiram ng Sandali. Hindi namin alam kung nahihiya lang pero sabi ni Pancho, ayaw niyang gumawa ng move para ligawan si Max.

Katatapos lang ng Magdalena, kung saan, sabi ni Pancho, napaarte siya ni Direk Gina Alajar. Waiting siya ng next project sa GMA 7. Sa ngayon ay naggi-guest muna siya at tuloy ang workout. Makikita ang ganda ng katawan ng binata sa billboard ng summer campaign ng Bench Body.