Markado Na

CEBU, Philippines - Sa daghang mga katuigan kanunay ko makadawat og mensahe (sa kahanginan ug mantalaan) aron magpatambag sa ilang gihambin nga mga suliran. Ug gumikan kay nagkadaghan man matag adlaw, tuyo nako nga gimugna ang bag-ong account aron didto atong saw-an ang inyong mga problema, sa ingon mas daghang makabasa, mas daghan ang makatambag. Busa sa tanan nga kaniadto pa nagsige og patambag nako bisan dili ako takos ug haom, palihug pagpakighigala ni...Markado Na

Yes dear okRYANians, sukad ko nag-sugod sa kahanginan adtong May 15, 2006, sa dyLA hangtud nga mibalhin ko sa dyRC adtong September 21, 2010, nagkadaghan ang magpatambag ug mangunsulta nako kabahin sa ilang gipas-an nga suliran. Ambot ngano nga ingon sila istrikto man matud pa ko sa kahanginan, pero prangka. Mao siguro nga naay ganahan magpatamdag sa ilang hunahuna pinaagi sa akong isulti ngadto nila. Hasta pud dinhi sa atong lindog, naay mu-text kay magpatambag, pero dili na lang nako imantala. Apan kun naa koy load akong tubagon basta tinarong lang ug matugkad sa akong linghod, usahay taphaw nga panghunahuna. Pakkk!

Seriously, I think sa mga pagsuway nga akong naagian ug nasagubang, ingon man sa mga problema nga mihampak sa among pamilya sa nanglabay nga mga katuigan nga ang tanan among gihangad sa Kahitas-an, naa pud siguro koy gamay nga ikapaambit ug naa pud moy gamay nga mapupo gikan sa akong hunahuna. Ginagmay lang gud. Maayo manang ginagmay basta kanunay lang! Pakpak!

Ug kun gugmahay sab, siguro sa akong pagkaduslak ng bonggang-bongga sa nanglabay’ng mga katuigan, sa akong pagtuo sa mga pasalig nga mga bakak ug sa mga pagbakho sa halawom nga mga gabii gumikan sa gugmay’ng napukan, I guess I have something to impart as well, kun kanang maong suliran ang atong pangahasan pagsulbad. Pero, ha, walay apil ang financial problem, dili na kaya sa akong bulsa karong mga panahona. Pakkk!

Pwes, sa katong mga okRYANians nga nagsige og text nako kay magpatambag, ilabi na tong mga bayot ug mga ginikanan nga naglisud pagdawat sa ilang anak nga bayot, pangitaa sa Facebook kining maong account: Markado Na (ryanmarkable). Email add: [email protected].  I-post ninyo didto inyong mga problema aron matubag ra nako anytime. Gawas pa, mas daghan pa nga mga tambag ang mulugwa sanglit ang makabasa niana sa akong wall, posibli man sad nga mupaambit pud sa ilang hunahuna. It’s interactive you know. The more, the merrier! Pwes, pangitaa na si Markado Na! Pakpak!

Magdungog gihapon ta sa dyRC 648khz., 10:30am to 12noon, Monday to Saturday nga tanan. Text me with your name and address sa 0943-431-4567. Kutob ra sa 12 noon karong adlawa, (January 31, 2013) ang pagdawat nato sa inyong mga reaksyon ani nga lindog. Pero ang inyong problema, bisan unsang orasa pwede ninyong i-post didto sa Markado Na. But, first amigoha sa ang maong account. Pakkk! (BANAT NEWS)