Giuwanan og death threats

CEBU, Philippines - Usa ka  babaye nga na-link sa usa sa miyembro sa One Direction ang giuwanan karon og death threats gikan sa mga fans sa nahisgutang  British boy band.

Giila ang maong babaye nga si Courtney "CJ" Webb, 21-anyos, usa ka waitress sa  Australia.

Nakadawat siya og hulga sa iyang kinabuhi sukad  nag-uban sila tibuok gabii sa sakop sa One Direction nga si  Zayn Malik.

Matud pa sa report nga ang common friend sa singer ug sa  waitress maoy nagpublikar sa contact number ni Courtney  pinaagi sa  Twitter hinungdan nga nakadawat siya og daghang tawag gikan sa mga fans sa maong grupo nga tataw nga nasuya kaniya.

"I was expecting some abuse but it has got out of control. I've had hundreds of calls from all over the world.One American girl left me six voicemails in an hour saying she was going to kill me. It's really scary,” nagkanayon si Courtney.

Gidungog nga kabit ni Zayn ang maong babaye sanglit aduna naman kini uyab. Giingong gipasaylo na si Zayn sa iyang uyab human kini nasakpan nga nakig-date kang Courtney.

Ang One Direction nisikat pag-ayo gumikan sa ilang hit songs nga  "What Makes You Beautiful," "Up All Night," "One Thing" ug uban pa.

Mas gipalig-ong  School of Rock!

Ang world-class nga Cebuana singer nga si Anna Fegi uban sa iyang bana nga si Adam Brown pormal na nga nakig-partner sa pagdumala sa The School of Rock nga unang gisugdan sa magtiayong Erwin Quisido ug Pia Salonga Quisido.

Gipadayag ni Anna nga dako kaayo og matabang ang nahisgutang tunghaan sanglit ilaha man nga gipalapdan ang ilang mga serbisyo sama sa pagtudlo sa nagkadaiyang music instruments nga mobaid sa mga tawo nga mahiligon sa musika.

Dugang pa ni Anna nga gawas sa  naandan nga voice lessons, labing maayo nga makamao usab ang mga tawo sa paggamit og mga instrumento sanglit dili man tanang tawo ang mahiligon sa pagkanta, apan ang gusto nila mao ang pagduyog sa mga mokanta.

Ang School of Rock nahimutang sa Gen. Maxilom Avenue kung diin gilangkoban kini og nagkadaiyang studio aron maka-focus ang ilang mga tinun-an sa pagtuon sa pagamit og  acoustic guitar, electric guitar, bass, keyboard, drums, violin, ug saxophone .

Nagkanayon si Anna nga dako usab kaayo og matabang ang iyang bana nga si Adam gumikan kay usa kini ka banggiitan nga drummer ug music director didto sa Cincinnati, Ohio.

Matud pa niya nga ang pagtuon sa pagamit og instrumento magsugod gyud sa basic ug mao kini ang pamaagi sa School of Rock.

Aduna pud sila’y buhaton nga nagkadaiya nga concert sa mga mall aron ma-expose ang ilang mga tinun-an sa publiko.

Samtang ang marketing officer sa maong tunghaan nga si Pia misaysay nga bisan kadtong tawo nga wala’y background sa musika ang mahimong mo-eskwela sa School of Rock.

Suma pa niya nga 90% sa kasamtangan nila nga mga tinun-an ang wala’y idea sa pagamit og instrumento, apan human sa pipila ka sessions, maantigo na kini sa pag-umol og musika.

Nasayod si Pia nga ilado kaayo ang mga Cebuano sa tibuok kalibutan gumikan sa kahanas niini sa natad sa musika, busa pinaagi sa ilang tunghaan, magpabilin ang maong kadungganan.

Samtang ang iyang bana nga si Erwin mao usab ang in-charge sa pagtimpla sa sounds ug lights busa usa ka hugyaw nga performance ang masaksihan sa nagkadaiya nila nga concert.

Kever sa Valentine’s Day

Giangkon ni Carla Abellana nga wala pa sila’y  plano sa iyang uyab nga si Geoff Eigenmann kung asa sila karong Valentine’s Day apan iyang gitataw nga dili sila interesado  nga mag-date sa maong adlaw sama sa nangagi nga mga tuig.

Matud pa niya nga kasagaran sa ilang romantic date mahitabo matag anibersaryo sa ilang relasyon

“Hindi naman kasi kami yung type na ma-date, e. Kapag ano lang… anniversary, ganyan. Pero pag Valentine’s Day, hindi masyado,” suma pa ni Carla ngadto sa PEP.

Samtang gibutyag sa aktres nga dili pa siya andam nga magminyo bisan pa man sa kalig-on karon sa relasyon nila ni Geoff.

Gibutyag kini ni Carla sa dihang gipangutana kung andam ba siya modawat kung pananglitan mo-propose si Geoff nga magpakasal  kaniya.

“Hindi pa. Definitely not now, not soon.So, hindi pa. Ang dami pang kailangang ayusin bago ako maging prepared for that,” matud pa ni Carla.

Jennylyn mitiyabaw sa presscon

Nahimong emosyonal  si Jennylyn Mercado sa dihang gikuhaan siya og reaksyon atol sa presscon kagahapon  kalabot sa gipadayag ni  Patrick Garcia nga matud pa iyaha kining gidid-an nga makaduaw sa ilang anak nga si Alex Jazz.

Suma pa ni  Jennylyn nga dili tinuod ang gisulti ni  Patrick. Naghilak nga nihangyo ang Kapuso star ngadto sa press  nga wala na la’y  follow-up questions kalabot niini.

Marian nag-neck brace

Pipila na ka adlaw nga  nag-neck brace si Marian Rivera gumikan sa naglabad niya nga ulo.Wala pa matino kung kanus-a makabalik ang aktres sa taping sa Temptation of Wife  ug sa shooting sa pelikula niya nga My Lady Boss.

Kim paborito sa netizens

Si Kim Chiu maoy napili nga Favorite TV Actress of the Year base sa gipahigayon nga online voting nga gihimo sa nagkadaiyang showbiz websites nga Starmometer.com, Showbiznest.com ug LionhearTV.net. Nakakuha ang aktres og 84.14% gikan sa  43,494 ka mga  netizens nga nisalmot niini.

Rufa Mae nagtoon og boxing

Busy karon si  Rufa Mae Quinto sa nagkadaiya nga  training  ug preparasyon alang sa umaabot niya nga pelikula nga  Huling Henya ubos sa  Viva Films. Nagtoon karon ang aktres og boxing gumikan kay gamit kaayo kini sa iyang karakter sa nahisgutang pelikula.

Sorry?

Andam na matud pa si  Maricel Soriano nga mangayo og pasaylo sa  ABS-CBN  gumikan sa nabuhat niini sa taping sa  Bukas Na Lang Kita Mamahalin kung diin gikasab-an niya pag-ayo si Gerald Anderson hinungdan nga nataktak siya sa maong serye.

Albert gipausab ang buhok

Gibag-o  ni  Albert Martinez ang estilo sa iyang buhok  alang sa serye niya nga Juan Dela Cruz. Gipatas-an ug gipakulot  ni Albert ang  iyang buhok gumikan kay gikinahanglan kini sa iyang role sa maong serye isip  hari sa mga aswang. 

Nangunay sa pag-atiman

Kanunay nga mag-standby si Marvin Agustin sa editing room sa Kanta Pilipinas aron makapaambit siya sa iyang mga ideya sa pagpanindot sa visual presentation sa maong show. Co-producer si Marvin sa nahisgutang  talent search show sa  TV5.

Gipilian pa

Suma pa nga naa ra sa Exodus o ba kaha  The Cure ang next series  ni Richard Guttierez sa GMA-7. Wala pa nakahatag og lapad nga detalye niini ang aktor gumikan kay naka-focus kini karon sa promosyon sa pelikulang Seduction.

Uyab ni Erich gikilig

Gibutyag ni Erich Gonzales nga mismo ang  iyang non-showbiz boyfriend ang gikilig sa tandem nila ni Coco Martin  sa dihang nakalantaw kini sa teaser sa serye nila nga Juan dela Cruz. Suma pa ni Erich nga supportive kaayo ang iyang uyab sa iyang trabaho.

Iza maoy nataypan

Si Iza Calzado maoy gipangandoy ni  Riza Hontiveros nga modala sa iyang karakter   kung pananglitan himoan og pelikula ang istorya sa iyang kinabuhi . Saludo si Riza sa kaanyag ni Iza ug sa ka maayo moarte niini.

Katapusang sexy cover

Katapusang sexy cover na sa Kapuso actress nga si Solenn Heussaff ang February issue sa Esquire Philippines, kung diin ginganlan siya nga  "Sexiest Woman Alive." Tsika pa ni Solenn nga ganahan lang siya nga mausab na pud ang imahe sa iyang career. (BANAT NEWS)