Bulahan ka Anne!

MANILA, Philippines - Si Anne Curtis maoy kasamtangang Filipino celebrity nga dunay labing daghan nga followers sa Twitter ug miabot na kini karon og kapin sa 4 million. “I guess January 28 is a lucky day for me. Happy 4 Million Followers to me! Wow! This is craaaaaaaazy!,” tweet pa ni Anne.

Matud pa nga base sa alas 6 sa gabii niadtong Lunes, niabot na iyang followers og 4,000,854.

Gihulagway niya nga suwerte ang Enero 28 sanglit mao usab kini ang petsa kung diin napuno ang Araneta Coliseum sa iyang Annebisyosa Concert sa miaging tuig. Samtang ang Enero 28 karong tuiga, mao usab ang paggawas sa figure sa Twitter  kung diin nahibaw-an niya nga nagbaha ang iyang followers.

Showtime pildi sa Wowowillie

Base sa  AGB ratings sa  Mega Manila households, nakaangkon og 12.2 % ang pilot episode sa noontime show ni Willie Revillame nga Wowowillie niadtong Sabado, January 26.

Samtang padayon nga nag-una ang Eat Bulaga sa GMA-7 gumikan kay nakabaton kini og 23.5 %, samtang ang  It’s Showtime sa ABS-CBN nakakuha lang og 8.8%. Apan sa Kantar-TNS national ratings, nangiwit ang Wowowillie ug nakakuha kini og 9.1 %, ,nag-una gihapon ang Eat Bulaga nga nakalangkat og 15%, samtang ang It’s Showtime nakahagpat og 12.1 %.

Justin ug Selena nagbuwag na pud!

Human nanggawas ang nagkadaiyang report kalabot sa iyang love life, gikumpirmar sa Canadian pop singer nga si Justin Bieber nga nagbuwag na pud sila sa  Disney Princess nga si Selena Gomez.

Giangkon ni Justin nga nasakitan gyud siya pag-ayo sa break-up nila ni Selena busa dili siya makaingon nga  "single but happy” ang iyang istado karon. "I'm not in the happiest place that I've ever been," tsika pa ni Justin kalabot sa ilang break-up. Nasayran nga niabot og duha ka tuig ang on-off relationship sa duha. Unang  gidungog kaniadto nga gibuwagan ni Selena si Justin human nalambigit ang naulahi sa usa ka modelo.

Samtang i-release na karong adlawa ang latest album  niya nga  "Believe Acoustic," nga dunay unod sa hit single niya nga "Nothing Like Us" nga naghisgot og break-up busa daghan ang nagduda nga gibase kini sa kaagi sa singer.

Limitado ang pagkaon

Gipahibalo ni Edu Manzano nga mabinantayon siya kanunay sa iyang mga kinaon gumikan sa iyang asthma. Kung mokaon siya, kinahanglan aduna kini tapol nga kan-on.

Empoy nataypan

Gibutyag sa komedyanteng aktor nga si Empoy nga mopirma siya og exclusive contract sa TV 5 sulod karong tuiga gumikan kay nakauyon matud pa kaniya ang mga kadagkoan sa maong network sa estilo niya sa pag-komedya ilabi na sa programa  niya nga Lokomoko. Gitsika kini ni Empoy sa dihang ekslusibo kini nga nahinabi sa Banat News Hugyaw sa usa ka kalihukan sa TV 5 didto sa Resorts World Manila dili pa lang dugay.

Andam na  mahigugma pagbalik

Gipadayag ni Zsa Zsa Padilla  nga nakaingon siya sa iyang kaugalingon nga andam na siya mahigugma pagbalik human niya nalantawan ang viral video  nga Jamich nga gipistahan pag-ayo karon sa Youtube. Ang mga video sa Jamich naglangkob sa mga short drama nga gibituonan sa  mag-uyab nga sila si Jamvhille Sebastian ug Michelle Liggayu.

Marcelito magminyo na

Pormal na nga gibutyag sa giila nga  "man with the golden female voice" nga si Marcelito Pomoy nga nagplano na siya sa iyang uyab nga magminyo.

Gikatahong engaged na sila si Marcelito ug sa iyang  non-showbiz girlfriend ug gipadayag nila nga sila na gyud ang mag-uban sa pagpaso sa altar sa kaminyon.

Wala hinuon gibutyag sa singer ang petsa sa kasal ug matud pa usa ka negosyante ang iyang uyab. Usa ka diamond engagement ring ang gihatag  ni Marcelito ngadto sa iyang uyab.

Kahinumduman nga nagsugod ang pagsidlak sa  career ni Marcelito human nidaog siya sa  talent show nga "Pilipinas Got Talent” sa ABS-CBN.