Kapuso actress Katrina Halili, ibabahagi ang kuwento ng kanyang buhay

MANILA, Philippines - Ngayong Sabado (January 26), alamin ang tunay na kuwento ng buhay ng Kapuso actress na si Katrina Halili sa Magpakailanman – Ligaw na Diyosa: The Katrina Halili Story.

Isa si Katrina Halili sa pinakasikat at hinahangaang young star ng kaniyang henerasyon. Mula nang maging bahagi siya ng kauna-unahang StarStruck ay sunud-sunod na ang kaniyang mga naging proyekto. At bagama’t ang kaniyang imahe ay nasa pagpapa-sexy, sa totoong buhay ay isa siyang simpleng tao na pamilya lang ang laging inaatupag.

Hanggang sa sumabog ang isang eskandalo sa kaniyang buhay. Alam na ng nakararami ang nangyari kay Katrina: mula sa pagkahulog ng loob niya sa lalaking may nobya na, sa scandal na sumubok sa pagkatao niya, at sa labang sinimulan niya hindi lang para sa sarili niya, kundi para rin sa mga kababaihan.

Kilalanin ang kakaibang Katrina Halili simula noong mga oras na akala niya ay wala na siyang pag-asa. At tuklasin kung paano ang isang pamilyang dati nang watak ay muling nabuo ng dahil sa isang trahedya.

Huwag palagpasin ang tunay na kuwento ng buhay ni Katrina Halili ngayong Sabado ng gabi sa Magpakailanman, pagkatapos ng Kap’s Amazing Stories sa GMA 7.