33rd Cebu Pop Awit sa pagpanalipod sa kinaiyahan ang midaog
CEBU, Philippines - Naghangyo sa tanan nga magtinabangay aron mapanalipdan ang kinaiyahan nga ginama sa Diyos. Kini mao ang mensahe sa kanta nga mugna sa usa ka Cebuano nga pari nga maoy grand winner sa 33rd Cebu Popular Music Festival adtong Biyernes sa gabii diha sa Cebu Coliseum.
Ang kantang “Magkuyog Ta,Panalipdan Ta†musika ug mga titik ni Rev. Fr. Charles Louis Jayme, gihan-ay ni Nendel Endrina ug giawit nila ni Medi Baculpo ug Rene Campomanes ang mipildi sa laing 11 pa ka mga finalist sa festival.
Malipayon ug mapasigarbuhon nga gidawat ni Jayme ang iyang kadaugan niadtong gabhiona. Inubanan sa maanindot nga pag-awit ug blending, ang kanta puno usab sa inspirasyon ug makahuluganon nga mga titik.
“May adlaw pa ug panahon sa paghatag ug paglaum.Panalipdan tang kalibutan ta karon,†tulay sa titik sa maong awit. Pinaagi sa pagpahaya sa iyang musika ang iyang inspirasyon sa pagmugna sa maong kanta mao ang mga kasinatian sa atung nasud sa mga bagyo. Busa giawhag niya sa tanan nga magkuyog ta, panalipdan ta ang kinaiyahan.
“Yes,masaligon ko nga naay chance nga masulod ang maong entry pero gikulbaan pud kay nindot pud ang ubang komposisyon sa ubang finalist,†asoy ni Jayme sa Banat News Hugyaw.
“Nagplano ko sa pag-save gamay nga portion sa kwarta para itabang sa mga kabos,†dugang pa niya.
Samtang ang awit kabahin sa kalit nga pagbiya sa pinalangga,nga naglaum ug naghulat nga mobalik pa kini , “Balik na Pinangga Ko†ni Jade Castro ang nakalangkat sa ikaduha nga pwesto. Gipakpakan ang makakumot kasing-kasing nga pag-awit ni Analyn Manlise sa maong kanta.
Ang awit nga nag-uluhan nga “Amomahon Ka†ni Niño James Bañares, gihan-ay ni Melvin G. Corpin ug giawit nila ni Jan Michael Banaynal ug Wondey Prado-Avendaño mao ang miangkon sa ikatulo nga ganti. Ang maong kanta naghisgot kabahin sa saad sa ginikanan sa iyang anak nga dili niya buot matagamtam ang kasinatian niya sa pag-antos.
Ang Best Interpreter karong tuiga usa ka grade 6 student sa University of Southern Philippines para sa kanta nga “Salamat†ni Erwin Lirazan. “Proud kaayo ko nga ako ray bata (pinakabata), nindot kaayo ang feeling kay ako ang na Best Interpreter bisan naay dagko ug mas naay experience kaysa nako pero ako gihapon ang napilian nga Best Interpreter,†nagkanayon si Knch Lynn Cabillo sa interview. “Ako gi-offer ang kanta sa akung parents. “Salamat†kay mapasalamaton kaayo ko nila sa pagpadako ug pagpangga nako.â€
Atol sa pagkanta ni Knch Lynn sa maong awit,puno kini sa emosyon nga nakapahugyaw pud sa mga manan-aw ug hingpit pud nga naghatud kaniya aron mahimong Best Interpreter karong tuiga.
Ang Grand Prize winner nakadawat og P150,000 cash, samtang P100,000 ang 2nd placer ug P50,000 ang 3rd place. P10,000 alang usab sa Best Interpreter ug P15,000 ang consolation prize.
Ang mga finalist sa 33rd Cebu Popular Music Festival naglangkip sa “O’Sweldo†ni Ulysses Earl L. Tenchavez; “Salamat†ni Erwin S. Lirazan nga giawit ni Knch Lynn Cabillo; “Balik na Pinangga Ko†ni Jade B. Castro ug giawit ni Analyn Manlise; “Usa Ka Libo Ug Usa Ka Panamilit†ni Jude Thadeus L. Gitamondoc nga giawit ni Cattski Espina; “Kay Unsa Ra Man Ako†ni Jay-arr Librando nga mao ra pud ang niawit sa maong kanta ; “Intertiner Lang Kami†ni Roy Tabasa giawit sa Dos Compañeros nga sila Franklin Padayogdog ug Carlito Betito; “Kaniadto Ug Karon†ni Roy Tabasa nga giawit nila ni Roy ug Riel Tabasa; “Magkuyog ta Panalipdan Ta†ni Rev. Fr. Charles Louis Jayme ug giawit nila ni Medi Baculpo ug Rene Campomanes ; “Gugma Ko†ni Fr. Ponce Jed Bellones nga giawit ni Jade Andrew Rosit; “May Katumanan Ang Tanan†ni Lauro B. Flores nga mao ra pud ang niawit niining kanta; “Awitan Mo Na Lamang†ni Archie J. Lesiguez ug giawit nila ni Sales Loreto, Reginald Detabali ug ni Archie Lesiguez.
Karong tuiga si Iian Gehrome Perpetua ang mibukas sa festival pinaagi sa pangaliya sa iyang pag-awit sa “Sto. Niño Giya Koâ€.Gisundan kini sa pagsayaw sa Sinulog nga halad alang kang Senyor Sto. Niño uban sa UV Filipiniana Dance Troupe ug ang pagkanta sa UV Chorale sa Nasudnong Awit.
Nahugyaw usab ang mga mananan-aw sa makalingaw ug maanindot nga production number sa Cebu City Dancesport Team. Ang Broadkaster nga si Sam Costanilla ug kanhi Pinoy Dream Academy scholar nga si Apple Abarquez mao gihapon ang mga hosts karung tuiga nga festival.
Karong tuiga,ang guest performers mao ang University of the Visayas Chorale ug si Anna Fegi-Brown.Gihugyaw sa UV Chorale ang mga mananan-aw sa makapanimbawt balahibo nga version nila sa “Go the Distance†ug ang makalingaw kaayo nga “Kagahapon ug Karonâ€. Si Anna Fegi-Brown usa usab ka produkto sa Cebu Pop Music Festival diin napili siya isip Best Interpreter sa ika 11 nga Cebu Pop.Niawit si Anna Fegi-Brown sa iyang version sa “Sing†nga nindot kaayo ,iya usab giawit ang iyang kaugalingong komposisyon nga “Don’t Say You Love Me nga gihan-ay ni Elvis Somosot ug ang iyang version sa “Usahay†nga puno kaayo sa emosyon ug nakakuha og hugyaw nga pakpak gikan sa mga mananan-aw. Matud pa ni Anna Fegi-Brown mosuporta gyud sya sa mga original nga composisyon.
Miawit ang grupong Huni sa Sugbo ( Benjie Layos,Wilson Po ug Daryl Shane Leong) nga maoy na Best Interpreter ug ilang giawit ang “Ulan†nga maoy grand prize winner sa ika 32 nga Cebu Pop Music Festival sa milabayng tuig diin ang nagmugna sa maong awit nga si Eugene Tan usa sa mga hurado karong tuiga.Naglangkob pud usab isip mga hurado sila Baby Condeno,Elvis Somosot,Cathy Rodil,Dennis Sugarol,Leiz Ambaic,Roberto del Rosario,Maria Donna,Ryan Mark,Eve Santos,Archie Marcial,Roger Serna ug Judge Simeon Dumdum Jr. isip Chairman of the Board of Judges karong tuiga.
Ang Cebu Pop Music Festival tinuig nga halad ni First District Representative Eduardo Gullas sa Balaang Bata Senyor Sto. Niño ug isip pag-abag usab sa pagpalambo sa Huning Bisaya.
Suma pa ni Gullas atol sa nahisgutang indigay, “Ang Cebu Pop was organized 33 years ago and it’s all about diwa ug pagtulun-an kang Senyor Sto. Niño. Kini maoy halad sa gugma ug pagtuo alang kaniya.â€
Nasayran nga ang mahipos nga kantidad gikan sa maong festival ihatag ngadto sa mga proyekto ni Gullas alang sa mga kabos.
Si Atty. Joseph Baduel mao gihapon ang project director karong tuiga inabangan sa Soundtraxx Production Studio sa magtiayong Gani ug Gloria Villarojo.
- Latest
