Karong gabii UV Chorale, Anna Fegi sa Cebu Pop

CEBU, Philippines -  Magpanon karong gabii diha sa Cebu Coliseum ang mga mahiligon sa musikang binisaya aron mosaksi sa gikahinaman nga 33rd Cebu Popular Music Festival.

Nasayran nga nahulma ang Cebu Pop aron  mapadayag sa katawhan pinaagi sa pagkanta  ang gugma nila ngadto sa  Balaang Bata nga si Senor Sto. Niño  ug sa samang higayon ,  molambo usab ang  music industry dinhi sa Sugbo.

Suma pa  sa  project director  sa maong kalihukan nga si Gloria Villarojo  nga 12 na usab ka mga bag-ong komposisyon ang madungog karong gabii.

Dugang pa ni Villarojo nga hugyaw ang presentasyon karong gabii gumikan kay napuno sa mga sorpresa ang i-perform sa mga interpreter matag komposisyon.

Sama sa naandan, adunay nagtangag nga mga ganti ang mapili nga mga mananaug ug ang 12 ka finalists naglangkob sa Salamat ni Erwin Lirazan; Oh Sweldo nila ni  Ulysses Earl Tenchavez ug Jesson Morata; Usa Ka Libo ug Usa Ka Panamilit nila ni Jude Gitamondoc ug Cindy Velasquez; Balik Na, Pinangga Ko ni  Jade Castro; Kay Unsa Ra Man Ako ni Jay-arr Librando; Entertainers Lang Kami nila ni Franklin Padayogdog, Carlito Betito ug Roy Tabasa; Magkuyog Ta, Panalipdan Ta nila ni Fr. Charles Louise ug Ramonito Carbon; Gugma Ko ni Fr. Ponce Jed Bellones; Amumahon Ko ni Niño James Bañares ug Ramonito Carbon; May Katumanan ang Tanan ni Lauro Flores; ug Awitan Mo Na Lamang ni Norberto Lesiguez.

Human sa 12 ka tuig , motungtung pagbalik sa entablado sa Cebu Pop  ang Sugbuanon nga mag-aawit nga si Anna Fegi kinsa produkto usab sa maong kompetisyon.

“Amo na nga gi-invite si Anna sa una, pero na-conflict lang gyud sa iyang schedule, maong karon ,happy kaayo mi kay makahalad na gyud siya og kanta,” matud pa ni Villarojo.

Kahinumduman nga gawas ni Anna, nahimo usab nga produkto sa Cebu Pop mao sila si Sheryn Regis, Raki Vega, Vina Morales, Dulce, Chad Borja, Eva Santos ug uban pa.

Nagkanayon si Villarojo nga modalit usab karong gabii sa  makabihag nila nga tingog mao ang inila na nga UV Chorale.

“Nindot kaayo ang Cebu Pop kay usa man gud kini sa paagi nga atung mahibaw-an kung unsa ka maayo si Senor Sto Niño. Atong timan-an permi nga para iya na nga event,”suma pa niya.

Dugang pa ni Villarojo nga gumikan sa kadugay sa maong kompetisyon, nagpakita lang kini nga pabilin nga gihangop sa katawhan ang  mga Sugbuanong awit.

Sila si Sam Costanilla ug kanhi Pinoy Dream Academy Scholar nga si Apple Abarquez maoy mo-host niini.

Nasayran nga gatosan ka entries ang nadawat sa screening committee sa maong kalihukan nga gipahigayon sa miaging tuig ug 12 lang ang  napilli alang sa palaran nga komposisyon.

Ang Cebu Pop maoy  tinuig nga halad ni First District Representative Eduardo R. Gullas  isip pagpadayag sa iyang dakong gugma ngadto sa Balaang Bata nga sa Senor Santo Niño ug agig pag-abag usab sa paglambo pa sa Sugbuanong musika.