Sinulog Idol 2013 labing higpit nga panagtigi?

CEBU, Philippines - Mosikad na karong gabii ang gipaabot nga Sinulog Idol 2013 nga ipahigayon diha  sa Fuente Osmeña Circle.

Matag alas otso sa gabii magtigi ang  12 ka  finalists ug maproklamar ang champion atol unya sa grand finals karong Enero  17.

Gipaabot nga may usa nga matangtang sa matag gabii nga kompetisyon nga nagtangag og nagkalain-lain nga genre.

Tsika pa sa  Sinulog Idol project director Gloria Villarojo nga nagbaha ang  mi-audition sa maong kompetisyon ug  gihashasan nila pinaagi sa pagpili sa 12 ka finalists.

Matud pa niya nga  mahanas gyud og maayo ang mga finalists sanglit kada adlaw ang ilang rehearsal ug matag gabii human sa performances, may general evaluation nga ipahigayon, gawas pa sa komentaryo sa mga hurado.

Sa nangagi na nga mga tuig , naandan na ang komentaryo sa mga hurado nga madungog sa tanan inigkahuman gyud og kanta sa contestant, wala gyuy lipud-lipod sa ilang mga komento ang mga hurado nga gilangkuban nila  ni Banat News Hugyaw editor ug dyRC program host Ryan Mark, Center for Pop-Cebu branch manager Jay Unchuan ug  Pinoy Dream Academy scholar Apple Abarquez .

"Sikat kaayo ang American Idol , maong nakahuna-huna si sir Ricky Ballesteros (Sinulog Foundation executive director) sa una nga mohimo og kalingawan samtang nagpadulong ang Sinulog. Maong nahuna-hunaan namo ang Sinulog Idol," suma pa ni Villarojo.

Matud pa niya nga gawas nga madiskubre ang talento sa mga kabatan-onan nga nagpangedaron gikan sa 15 ngadto sa 25 anyos, makat-on usab sila sa pag-host ug pagsayaw.

Dugang pa ni Villarojo nga gawas nga ang mga hurado muhukom, mubarog usab sila  nga mentors sa tanang finalists, pinaagi sa nagkadaiyang workshops.

Giatngan na matag tuig ang  Sinulog Idol nga  gidumala sa Cebu City Government, Sinulog Foundation Inc., Center for Pop Music Philippines ug Soundtraxx Productions Studio.

Gawas sa pagkanta, pagsayaw ug pag-host , gibansay-bansay usab ang mga finalists sa saktong gesture kung naa sila sa entablado.

Gitudluan usab sila unsaon pag-abi abi  sa entertainment press, ingon man ang saktong pamatasan.

Kung dunay ma-eliminate  matag gabii, aduna puy matuboy nga Star of the Night gumikan sa hugyaw nga performance sa usa ka finalist.

Bisan pa man nga nindot na ang mga tingog sa idols,  gipaubos gihapon sila sa dugang voice lesson diha sa  Center for Pop.

"Ang nakalahi karon nga batch, kay majority nila dunay mga title, ang uban kay champion o runner-up sa mga singing contest ," matud pa ni Villarojo.

Ang nangagi nga mga idols maoy magsilbi usab nga co-host ni Sam Costanilla sa maong contest  matag gabii.

Matud pa ni Villarojo nga usa sa atngan sa Sinulog Idol karong tuiga mao ang hugyaw  nga production number kung diin pang-konsyerto ang peg niini.

Gihulma ang maong singing contest aron mailado og samot  ang mga Sugbuanon sa natad sa pagkanta   sa nagkadaiyang dapit sa kalibutan.

Ang 12 ka finalists sa Sinulog Idol 2013  naglangkob nila ni Cherish Pearl Cartalaba, Claro Maylon Jr.,  Alden Asehan Jr.,  Dan Valentine Escasinas III,  Earl Anthony Enolpe,  Mariel Minglanilla,  Hannah Mariee Rondez, Melody Esther Loren Hodso , Junrey Rosales Tomong , Ma. Shiella Lopez, Trisha Mae Noval Tarona  ug Sean Michael Uy.