Karong Gabii Na!

CEBU, Philippines - Kung ang teaser plug maoy basehan, maingon nga ang teleserye nga Baylo Ta, nga isalida na sa CCTN-47, matag alas otso hangtud alas otso y medya (8-8:30pm, Mondays to Fridays) susama gyud og istorya sa sikat kaayo nga obra ni Marcos Sacol nga “Milyonaryong Mini,” nga nahimuan pa gani og pelikula ug gi-remake sa ABS-CBN-Cebu kaniadto.

Apan suma pa sa usa sa mga cast niini nga si Tess Diez, inspirasyon lamang ang nahisgutang obra kay ang gibasehan sa Baylo Ta nga co-production venture sa CCTN ug sa M-Talent Events and Promotions ni Aida Patana, mao ang malampuson nga drama Bombo Radyo nga nag-ulohan og “Pag-Tsur Uy” nga sinuwat ug ubos sa direksyon ni Ronnie Gonzales.

Atol sa presscon para sa maong serye nga gibituonan ni Aida sa milabay nga bulan diha sa The Gustavian-Banilad sa milabay nga bulan, nasayran nga si Gonzales pud ang writer ug director niining Baylo Ta. Ang kalainan lamang matud pa sa Pag-Tsur Uy ug Baylo Ta mao nga ang nahauna, “full-length comedy” samtang ang nauwahi “love story-comedy.” Laing cast nga si Mandaue City Councilor Editha Cabahug, kinsa nakaapil pud sa “Milyonaryong Mini” sa Alba Productions ug gisalida sa ABS-CBN-Cebu kaniadto, mihulagway sa “Baylo Ta” nga “high-end” version.

Si Cabahug, kinsa mudala sa papel sa usa ka donya nga inahan sa bidang lalaki nga si Emilio, midugang nga ang Baylo Ta, “ is not just about the story, but also the scenery,” sanglit may eksena man sila nga didto gimugna sa Hongkong ug ipakita usab ang mga tourist destinations sa Sugbo sama sa beaches ug landmarks.

Si Cabahug, mapasigarbuhon nga mipahibawo nga sa kadugay na niya nga artista sa Cebuano TV series, labing una kining higayon nga adunahan ang iyang papel, sanglit kanunay matud pa nga pobre siya sa iyang mga roles kaniadto. Apan miklaro siya nga “donya nga buotan” siya sa Baylo Ta.

Samtang si Diez, miingon nga sa Baylo Ta, puros mga adunahan ang mga pamilya, ugaling lang, napobre ang usa gumikan kay “social climber” ang inahan, hinungdan nga tinguha niini nga maminyo og adunahan ang iyang mga anak aron mahibalik ang estado nila sa taas nga hut-ong sa katilingban.

Dugang pa niya ang “twist” sa Baylo Ta mao nga ang buotang donya aduna pa diay laing anak nga gitaguan sa Amerika ug dili kay si Emilio lamang ang bugtong manunod sa katigayonan niini.

Aida and Cathy

Sa Baylo Ta, bida si Aida, ug igsuon niya ang maldita ug ambisyosa nga babaye nga hatagan og kinabuhi ni Cathy Cabahug. Si Tess maoy ilang inahan nga utro pud nga social climber.

Unang higayon kini nga mu-arte ni Aida, apan aminado siya nga kaniadto pa, sa nagtubo pa lamang siya sa Mindanao, ganahan na gyud siya mutan-aw og mga teleserye ug mahiligon gyud siya og mga artista, mao man gani hinungdan nga sa milabay nga tuig gimugna niya ang M-Talent Events & Promotions.

Wala matud pa siya’y plano unta nga mag-produce og teleserye ug mu-arte, apan nadasig siya human usab niya og salmot og seminar sa Oasis of Love nga gipasiugdahan sa CCTN. Giagna lamang unta siya matud pa nga mu-guest sa usa sa mga episodes sa Dear Tatay, apan nakahukom siya nga mag-produce og teleserye aron usab makatabang siya pagpalambo sa Visayan TV series.

“Sayang pud ang Cebuano talents, daghan ra bang mga gwapo ug gwapa diri nga pang-showbiz gyud pero maglisud og adto sa Manila, so tabangan nato sila. I-promote nako ang Visayan talents” nagkanayon si Aida, kinsa miingon nga padayon matud pa siya nga mukaplag og mga bag-ong talento nga may igong potensyal aron mamahimong dagkong bituon sa showbiz ugma damlag.

Gibutyag niya nga sa unang mga adlaw sa taping nakulbaan gyud siya sanglit una kining higayon para niya apan sa kadugayan naanad na siya ug nalingaw na. Apan ang beteranang aktres nga si Tess, mihatag og pasado nga grado sa newcomer nga si Aida. “As first timer she has enough potentials to make it,” komento ni Tess.

Kun una kining pag-arte ni Aida, gikiwawan pud si Cathy sa sinugdanan sa iyang role sanglit dako kaayo kini og kalainan sa iyang pagka siya. “It’s very challenging because yes, I’m not like that. I hope makuha nako ang ambisyosa nga social climber nga ilang gustong ipakita nako (sa serye),” ni Cathy pa.

Hulagway pa ni Cathy nga peg niya ang character ni Maja Salvador sa Ina, Anak, Kapatid, samtang ang kang Aida si Kim Chiu.

  Tulo ka bulan lang ang kontrata sa Baylo Ta sa CCTN ug human niini, mag-produce na pud matud pa si Aida og lain na pud nga teleserye.

Uban pang cast sa Baylo Ta  mao sila si  Kevin Cabahug, Bruce Garcia, Gregg Lawas, Jim Carba, Eman Flores, Epoy Caballero ug Bong Gemino. Dunay special participation sila si Daisy Reyes, Monica Sakay, Dane Zapanta, Nyumi ug Glenn Soco. (BANAT NEWS)