Piolo sasabak muna sa pagiging VJ

MANILA, Philippines - Patutunayan ng hunk actor-singer na si Piolo Pascual na hindi lamang siya isang magaling na aktor ngunit maipagmamalaking host din sa paghahatid niya ng pinakabago sa mundo ng musika ngayong buwan.

Maliban sa mga talentong ito, itinatag na rin ni Piolo ang sarili bilang isang matagumpay na mang-aawit nang mabigyan ng Platinum award ang kanyang tatlong studio albums na Piolo, My Gift, at Timeless. 

Noong 2007 din ginanap ang kanyang unang concert sa Big Dome kasabay ng pag-release ng kanyang ikalimang album bilang selebrasyon sa kanyang ika-sampung anibersaryo sa showbiz.

Sa kasalukuyan, mayroon na siyang pitong album, tatlo rito ay studio album at ang apat ay compilation albums. Malimit ding marinig ang kanyang mga awitin sa mga teleserye at pelikula, kung saan ang pinakahuli ay ang theme song ng paparating na Little Champ na sinabayan ng musika ng ABS-CBN Philharmonic Orchestra.

Pakinggan si Piolo sa MYX, ang numero unong music channel sa bansa sa mga sumusunod na petsa: January 3-5 sa Pop MYX, January 6-12 sa Pinoy MYX, January 13-19 sa Mellow MYX at January 20-31 sa My MYX. Para sa mga updates, mag log on sa www.myxph.com at i-download ang MYX Charts iOS mula sa App Store ng libre.