2013 To Do!

MNNAOTW (Mao nani all over the world) mga ka Tribung BisChikadora. Pila na lang ka adlaw bag-ong tuig na halos dili ko katu-o nga kadali lang kaayo ang dagan sa panahon. Nakaingon ko karung tuiga daghan kaayo ko dapat ipasalamat sa Kahitas-an kay nagpabilin gihapon ang inyong Yur’s truly sa industriya nga akong gimahal ang telebisyon ug ang pagsuwat sa Banat Hugyaw. Halos dili nako ma imagine nga magdugay ko, basta aduna kay pagmahal sa imong trabaho makaya ang tanan!

Sa pagsulod sa bag-ong tuig tuguti ko ninyo nga ipaambit ang mga gusto nakong buhaton basin pa diay kamo mga Bischikadora matabangan ko ninyo o di ba ikaw matabangan nako. Dili kinahanglan nga dada (kwarta) ang dakong suporta dili kabayran ug salapi.

1. Balik exercise - sunod tuig mobalik nako sa pagpaugnat og kusog bisan dili nako ma achieve 34 24 34 nga body figure, basta lang kanang mawala ang feeling nga bisan magliston ka hangakon ka? Hahahaha! (Go go go, itodo na gyud!—Ryan Mark).

2. Oras sa Kaugalingon - sunod tuig akong tagaan og oras akong kaugalingon sama sa paghatag og break, gusto ko nga naa lang ko sa baybayon gahigda higda unya gabasa sa akong gusto nga libro. Kay tungod sa kadaghan sa trabaho o raket usahay kalimot ko nga tawo ko nga nagsakuban sa butanding nga lawas….hahahaha!

3. Oras sa Pamilya - tungod kay ga boarding house ko, usahay ang weekend dili pa nako mahatag sa akong pamilya. Ang simple nga panagtapok tapok unya dungan mangaon, kung dunay extra dada (kwarta), isuroy sa mall ang mga bata kay para nako maka re charge kini sa akong kaugalingon.

4. Mas Organize pa! - feeling nako dapat ang pag-organize sa mga ginagmay nga mga butang akong tutukan, di nako pataka bisag asa nako ibutang ang mga resibo, sa opisina mas hapsay ang mga files, sa boarding house ako na lahiun ang malata ug dili malata. Dili nako isalig ang tanan kay Angelica kay panahon nga mangita nako dili nako siya samukon.

5. On Time - kahibalo ko nga busy ko sa trabaho o raket pero akong buhaton ang tanan nga makahatag ko sa deadline on time. Plano nako naa koy reminder notes nga nakapilit sa pultahan sa boarding house kanus-a ang mga payables ug deadline sa mga angay nako buhaton ug numero sa listahan mao ang pagsuwat sa BisChika kay naa na sa akong sistema ang pagsuwat sa akong lindog, pero ang deadline mao na ang akong dapat ma-beat!

Sa pagsulod sa bag-ong tuig manghinaut ko nga mag-uban uban lang gihapon kita. Mga bag-ong hagit sa atong kinabuhi, anaa kamo!. Dili man nako matagsa tagsa para pasalamatan kamong tanan pero kahibalo ko nga matag basa ninyo sa Banat Hugyaw BisChika ug sa matag tan-aw ninyo sa BuenaMano Balita, dako kaayo kini nga suporta, maong laumi ninyo sa sunod tuig mas doblehon pa sa inyong BisChikadora ang paghatag og mga lab-as nga BisChika, mapaHugyaw nga impormasyon kay para namo kamo ang among boss!

Happy New Year kanatong tanan!

BisChika greetings : Belated Happy Birthday to Maria Therese Calo, Kuya Winson Bacalan. More