After-Christmas Sale sa Gaisano Main, Country Mall

CEBU, Philippines - Ang Gaisano Main ug Gaisano Country Mall mopahigayon og unom ka adlaw nga year-end savings pinaagi sa ilang “Balik-sa-Main After Christmas Sale” sugod Dec. 26 hangtod 31.

Mukabat ngadto sa 50% ang diskwento sa mga piniling palaliton ug may kahigayonan usab sa pagdaug og tulo (3) ka Mazda2 ug minilyong kantidad sa home appliances. pinaagi sa ilang “A Million Thanks” promo. Ang unang pagbola ipahigayon sa Dec. 29 uban nila ni Kit Thompson ug Tintin Patrimonio diha sa Gaisano Main alas-6 sa gabii ug inig untop alas-7:30 sa Gaisano Country Mall.

Baylo Ta sa Park Mall

Adunay mall tour nga ipahigayon ugma puhon, December 29, ang casts sa umaabot nga teleserye sa CCTN 47, nga Baylo Ta.

Anha kini ipahigayon sa Park Mall sa north reclamation area, alas siete (7p.m.) sa gabii.

Panguluhan kini sa bida ug producer sa maong serye nga si La Aida Lopez, kauban ang tibuok casts, ilabi na nila ni Stephanie ug Glenn Soco.

Mubutho pud ang young star nga si Niel Coleta nga makita sa teleseryeng Aryana sa ABS-CBN kauban ang produkto sa Star Power nga si Monica Sacay kinsa apil pud sa maong teleserye.

Ang Baylo Ta makita sa CCTN sugod karong January 7, 2013, matag Lunes ngadto sa Biyernes, 8-8:30p.m.

 Ubos kini sa M-Talent Events and Promotions.

Loydie Box-Office King of All Time?

Si John Lloyd Cruz gyud maoy numero unong actor karong mga panahona kun basehan ang kita sa iyang mga pelikula sa milabay nga lima ka tuig.

Base sa talaan sa third-party tabulator Box Office Mojo, nga gimantala sa www.starmometer.com ug gibalita sa Banat News Hugyaw kagahapon, pito sa 10 ka mga pelikula nga nalakip sa Highest Grossing Filipino Film Of All Time,  ang puros gibituonan ni John Lloyd. Kun tipunon tanang kita sa maong pito ka pelikula, mukabat kini ngadto sa usa ka bilyon.

Sa 10, duha niini ang kang Vice Ganda, diin kun kwentahon tanan, naa lamang sa mga 600 million.

Usa sa 10 ang pelikula ni Anne Curtis.

Ang pito ka mga pelikula ni John Lloyd nga pasok sa listahan mao ang The Mistress, You Changed My Life, A Very Special Love, Unofficially Yours, One More Chance, My Amnesia Girl ug Miss You Like Crazy.

Alang sa wala makabasa kagahapon, ania ang nahisgutan nga talaan:

Highest-grossing Filipino movies of all time

(As of December 24, 2012)

Apan sa forum sa www.starmometer.com niining maong artikulo, may mga mi-question sa listahan sanglit kun iapil na ang mga pelikula nga gisalida atol sa Metro Manila Film Festival.

Nasayran nga sa pagpili sa box-office king and queen, kanunay nga dili ilakip ang mga pelikula nga apil sa MMFF sanglit, mutadlas pa man kini ngadto sa unang semana sa bag-ong tuig ang pagsalida. Gawas pa, may bentaha ang MMFF movies sanglit, bugtong sila ra maoy magtigi niining panahona, sukwahi kun walay MMFF diin makigsungag ang pelikulang Pinoy sa mga gama sa Hollywood, busa tungason kaayo ang kompetisyon.

Dugang question mao ang wala pagkalakip sa Sukob ni Kris Aquino ug Claudine Barreto adtong 2006 nga mikita og P186 million, sanglit gisalida man kini nga dili atol sa MMFF (July 2006). Ang Sukob maoy giisip nga highest grossing of all time, hangtud nga gibuntog kini sa You Changed My Life niadtong 2009.