Ogie nag-aalala sa mga manliligaw ng dalawang dalagita
PIK: Naikuwento sa amin ni Regine Velasquez na nag-i-enjoy siya sa ginagawa niya sa Sarap Diva. Twice a month lang naman kasi siya nagti-taping at parang hindi trabaho sa kanya dahil type na type niyang nagluluto at may super tsikahan pa siya sa mga guest niya.
Bukas ay mga young mom ang special guest ni Regine na sina Danica Sotto at Donita Rose. Pero magdadagdag kuwela si Ryzza Mae Dizon na magtuturo siya ng sarili niyang style ng cha-cha.
PAK: Tinuturing ni Sen. Bong Revilla, Jr. na napakalaking challenge sa kanya ang Indio dahil bukod sa napakalaking proyektong ito ng GMA 7, matindi ang mga eksenang ginagawa niya.
Ang pinakamahirap sa kanya ay kailangan niyang kabisaduhin ang napakahabang dialogue na pawang malalalim na Tagalog.
Nandiyan si Philip Salvador na tumatayong acting coach ni Sen. Bong kaya malaking tulong ito sa kanya.
Pati ang ilang co-stars ni Sen. Bong ay natsa-challenge rin sa mga eksenang ginagawa nila sa malaking epic seryeng iyon.
BOOM: Ngayong araw ang alis nina Ogie Alcasid at Regine Velasquez kasama ang anak nilang si Baby Nate patunong Australia para mag-Pasko kasama ang dalawang anak nina Ogie at Michelle Van Eimereen.
Kuwento ni Regine, ang pinaka-excited sa lahat ay ang dalawang dalagita ni Ogie na sina Sarah at Leila. Kaya medyo magtatagal sila roon para lalong mag-bonding ang magkakapatid.
Naikuwento rin ni Ogie na medyo nag-aalala na siya ngayon sa dalawa niyang dalagita dahil lumalaki na at naliligawan na.
“Normal lang naman siguro sa isang ama ’yun kasi lumalaki na sila eh. Pero mababait naman ang mga anak ko. Nasusubaybayan ko naman sila kahit malayo ako,” pahayag ni Ogie.
Bilib nga si Regine kina Ogie at Michelle dahil talagang updated ang ama sa lahat ng mga ginagawa ng anak nila. Lahat ay niri-report ng ex-wife kay Ogie. Malaking tulong din ang asawa ni Michelle na si Mark Murrow dahil tumatayong ama rin ito sa dalawang bata.
Bago mag-New Year ay babalik na sila ng bansa at aasikasuhin na ni Regine ang repeat ng Silver concert niya sa SM Arena dahil naka-schedule na ito sa Jan. 5.
- Latest
