Miss Universe nagmukhang cooking show!

Super emote ang ibang mga bitter Pinoy dahil hindi nila matanggap na first runner-up lang sa Miss Universe 2012 si Janine Tugonon ng Pilipinas.
 ’Di hamak raw na mas deserving na manalo si Janine kesa kay Olivia Culpo ng USA dahil reynang-reyna siya sa pagrampa at bonggang-bongga ang sagot niya sa question and answer portion.

May mga pakunsuwelo de bobo ang mga bitter mula sa mga kababayan natin na nabubuwisit din sa naging resulta ng contest. Hindi raw naman magtatagal ang pagiging Miss Universe ni Olivia dahil ngayon ang end of the world, ayon sa Mayan calendar.
    ’Yung ibang mga baklita, cooking show ang tawag sa Miss Universe dahil luto raw ang contest. May mga nangungumbinsi naman na huwag bumili ng condo unit sa Trump Tower na itinatayo sa Makati City dahil pag-aari ito ni Donald Trump, ang may-ari ng Miss Universe Organization.

Sumumpa naman ang ibang mga iritable na magre-research sila sa Internet dahil baka sakaling may eskandalo si Olivia para ma-dethrone ito at malipat ang Miss Universe crown kay Janine. ‘Yan ang mga sinasabi ng mga Pinoy sa kanilang mga banta na halata namang puro biro lang.
Hindi man niya na-take home ang korona, siguradong magkakaroon si Janine ng mga product endorsement. Huwag din tayong magulat kung may mag-alok sa kanya ng pelikula o TV show tulad ng mga past beauty queen na nagkaroon ng showbiz career dahil napansin sila sa mga international beauty pageant na sinalihan.

Maraming Pilipina ang magaganda at matatalino. Hindi dapat mawalan ng pag-asa ang mga obsessed sa mga beauty contest dahil darating ang araw na masusungkit ng isang Pinay ang mailap na korona at title ng Miss Universe.

Ogie pumayat sa pagtakbo

Umapir si Ogie Alcasid sa presscon ng Silver Rewind noong Miyerkules ng hapon dahil sinundo niya ang kanyang mag-ina.

Medyo pumayat si Ogie at ang pagtakbo ang kanyang sikreto. Health conscious na si Ogie dahil hindi na siya bumabata.

Kamukha ni Regine Velasquez si Nate pero nang kargahin ni Ogie ang bagets, kahawig din niya si Nate. Totoo yata ang kasabihan na nagiging magkamukha ang mag-asawa habang tumatagal ang kanilang pagsasama at ebidensiya ang hitsura ng mga nagiging anak nila.

Regine na-maintain ang katawan sa Sexy Solutions

Na-maintain ni Regine ang kanyang kapayatan dahil sa tulong ng Sexy Solutions ng Belo Medical Clinic, isa sa mga major sponsor ng Silver Rewind.

May clinic ang Sexy Solutions sa 3rd floor ng Il Terrazo sa Morato Avenue, Quezon City. Hindi na kailangan ng mga potential client na sadyain ang mga clinic ng Sexy Solutions sa Makati City at The Fort sa Taguig City.

Bagong show ni Pacman na Para sa ’Yo, uumpisahan na   

Para sa ‘Yo ang working title ng bagong public service program ni Congressman Manny Pacquiao sa GMA 7.

Patapos na ang 2012 kaya mag-uumpisa sa 2013 ang show na galing ang pamagat sa title ng hit song ng Pambansang Kamao. Hintayin natin ang announcement ng Kapuso management sa exact date ng pagsisimula ng new television show ni Papa Manny.