Kalipayan Festival

CEBU, Philippines - Mga hulagway gikan sa Kabanay Francisco Javier Facebook Page Maayong adlaw dear okRYANians! Usa ko ka semana nga nagbakasyon sa akong yutang natawhan sa Pilar Camotes (Ponson Island) gumikan kay fiesta man pahinungod sa among mahal nga patron San Francisco Javier (December 2-3), ug birthday pud nako (December 5). I am now 33 years old, pero dili ra gyud ko masuko anang permi dili mutuo nga mao na nay akong pangidaron kay lagi, daw 25 anyos pa kuno ko og dagway. Unya maglagot diay ko ana? Pakkk!

Bitaw miabot ko sa Camotes via Ormoc (nag-seating accommodation ang timawa nga si okRYAN kay mao ray kinabaratuhan, keri ra man pud), 10:30 na sa buntag igo gyud nga nahuman ang labing unang Kalipayan nga nagsugod sa pantalan sa lungsud paingon sa simbahan sa parokya sa kinapusuran gayud sa poblacion. Ang Kalipayan, halad sayaw pasalamat nga gisalmutan sa mga dancers nga naggikan sa 13 ka mga barangay sa Pilar ug gibansay sa akong kuya Peter Cawayan (paryente mi ug mentor nako siya sukad adtong sip-onon pa ko). Sila maoy lead dancers kay sila man gyud maoy nagtuon sa dance steps sulod lamang sa duha ka semana. Apan ang mga parokyano nagwara-wara sa ilang mga kamot ug miabiba kang San Francisco Javier nga misunod sa panon nga nagsayaw mikabat ngadto sa usa ka libo. Bata, tiguwang, babaye, lalaki, ug uban pa, wala panumbalinga ang naglagiting nga kainit sa haring adlaw, giuhaw sila, gipaningot og maayo apan sige lamang sila sa ilang pagsayaw. Silang tanan nahugyaw! Pakpak!

Sa nanglabay nga mga katuigan, naandan na nga may fluvial parade sa kadagatan sa Pilar, apan labing unang higayon karong tuiga nga ang mga dancers nga mitungtong sa pumpboat nga gisakyan sa patron, walay puas sa ilang pagsayaw. Ang mga nakasaksi nanlimbawot ang balhibo, ang uban mitulo gayud ang mga luha.....mapasalamaton, mahinangpon, masaligon, mainampuon ug malipayon nga mitimbaya sa mapinanggaong presensya sa among patron sa daghan na nga mga katuigan. Pero nganong Kalipayan man?

Sa katapusang adlaw sa akong bakasyon adtong Huwebes, December 6, hingpit nako nga nahimamat ang among bag-ong Kura Paroko nga si Fr. Ricky Bermudez human sa santos nga misa nianang pagka alas sais sa bag-ong gabii. Gipaila-ila ko ni Kuya Peter (hi Kuya, dihas barangay hall sa Lahug), kay nangita man ko og hulagway sa gipahigayon nga Kalipayan kay wala man ko makaabot. Tsika-tsika mi og ginagmay hangtud nga mipauli usa ko sa balay ug mibalik ko sa kumbento human sa duha ka oras kay may gipangayo ko ni Fr. Bermudez nga akong gikuha. Si Fr. Bermudez gikan sa Shrine of Our Lady of The Rule diha sa Opon. Musically-inclined gyud siya, nagtubo siya sa pamilya sa mga musikiro didto sa Surigao niadtong Agosto, 17, 1972.Lima sila ka managsuon, ikatulo siya. Ang iyang inahan niya pa, average singer, samtang ang iyang amahan soloist sa ilang family comparsa.  Nadestino siya sa Pilar niadto pa lamang Hulyo. Dugay na matud pa niya nga plano nga mupahigayon og ingon niini nga halad sayaw pasalamat, diha pa siya sa Opon. Niadtong milabay nga September, nadasig siya nga hatagan na gayud og katumanan ang iyang plano human usab na-diagnose nga may stage 4 prostate cancer ang iyang amahan. Personal niya matud pa nga pasalamat kadto nga ang iyang papa nga sa dugay’ng panahon nagmagahi nga mupailawom og operasyon, misugot na gyud nga magpa-opera. Giampo matud pa niya ang tanan kang San Francisco Javier ingon man kang San Pedro Calungsod. Apan matud ni Fr. Bermudez nga sa nagkadugay na siya didto sa Pilar, nakita niya ang panginahanglanon sa mga parokyano nga makapadayag sa ilang lig-on nga pagtuo. Nakita niya nga kahigayonan ang usa ka halad sayaw pasalamat nga mahiusa ang tanan sa pagpangaliya ngadto sa among mahal nga patron ug ipabuhagay ang ilang pagtuo. Ug lagi kay mahiligon man siya sa musika, gani may gihimo naman siya nga recording studio tua mismo sa kumbento, dali niya nga gihimuan og bag-ong tirada ang Gozos ni San Francisco Javier nga lively na, apan makahuluganon lamang gihapon kaayo ang tanang pulong paminawon. Kalipayan ang titulo sanglit mabasa matud pa ang usa ka verse sa gozos nga naghisgot og "siyam ka hagdan" nga  para ni Fr. Bermudez nagsimbolo sa siyam ka adlaw nga novena diin kun makompleto nimo kini maangkon nimo ang kalipay gumikan kay madawat nimo ang imong gipangayo sa patron nga maoy imong petisyon o giampo diha sa novena. Pwes, perteng hugyawa gyud sa pista, apan sa samang higayon labihan ka makahuluganon ug ka mainampuon. Pakpak!

Dako ang pagtuo sa mga parokyano nga ang pangaliya nila ngadto kang San Francisco Javier usa sa mga rason nganong bisan pa man og gipuntarya sa Bagyong Pablo ang Camotes, igo lamang nag-uwan ug hangin nga dili kaayo kusog didto sa isla niadtong panahona. Malaumon si Fr. Bermudez nga sa musunod pa nga Kalipayan mas daghan pa ang mga parokyano nga mutimbaya ug musalmot sa kalihukan isip pamaagi sa pagpasalamat sa mga grasya nga nadawat ug paghangad ngadto sa Kahitas-an sa mga suliran ug kasakit nga gihambin sa usag-usa, dungan sa hugot nga pagtuo nga may kasulbaran ang tanan sa tukmang panahon. Pero unsa may akong gibalik didto sa kumbento? Nangayo ko og cd ni Fr. Bermudez sa pito ka mga kanta nga official entries sa labing una pud nga Halad Awit pahinungod gihapon sa among patron. Kay lagi nag-seating man sa barko ang uyamot, perti nakong hagok nianang pagka December 2 sa gabii nga maoy pagpahigayon sa Halad Awit. Nahugyaw na lang ko pagkanta sa first ug second prize winners respectively atol sa santos nga misa nianang pagka pista na gumikan sa kanindot niini, busa may-ask gyud dayon og kopya nga maoy akong gihimong sinugatan sa tanang mga okRYANians sa akong pagbalik sa kahanginan niadtong Lunes. Pakpak!

Malipayon ug mapasigarbuhon kaayo ko isip lumad nga Pilaranon nga sa kagamay sa among isla, may mga ingon niining relihiyoso nga kalihukan nga napahigayon ubos mismo sa pagpaningkamot ni Fr. Bermudez. Daghan pa kaayo siya og plano para sa parokya ug sa mga parokyano, hinungdan nga nanawagan ko sa tanang Pilaranon sa tibuok kalibutan nga ato siya'ng suportahan. Isip pasiunang lakang sa atong pagbalik ug pagtabang sa atong mahal nga lungsod, pangitaa sa Facebook ang atong account: Kabanay Ni Francisco (St. Francis Javier). Diha sa maong FB page, masayran nato ang mga kalihukan, proyekto ug mga plano sa parokya ni San Francisco Javier, ang dapit diin kita nahimugso, naningkamot, nangindahay hinungdan nga nahidangat kita sa atong nahimutangan karon nga malampuson. Viva San Francisco Javier. Viva Viva Viva!

Magdungog gihapon kita pinaagi sa okRYAN sa dyRC 648khz., 10am to 12noon...Lunes hangtud sa Sabado. Pangitaa ko sa Facebook: [email protected]. I-text ko sa 0943-431-4567...kinahanglan adunay ngalan ug address. Dili ko makig-textmate! Pakkk

(BANAT NEWS)