Paukyab ni Willie

CEBU, Philippines - GARRY: Congratulations sa tanang nagpaluyo sa gipahigayon nga 4th Christian Athletic Volunteers (CAV) Basketball Invitational Tournament diha sa Barangay Tejero. Impressed na impressed si Mikee Cojuangco sa iyang pagbisita sa Sugbo diin iyang gikuyogan iyang mother nga si former governor Tingting Cojuangco. Ug advance Happy Birthday Banat Hugyaw editor Ryan Mark nga mibakasyon karon sa iyang minahal Pilar, Camotes Island.

Speaking of bakasyon, dili ni bakasyon ang kang Willie Revillame nga mo-baboo ang iyang Wil Time Bigtime karong January 2013. Mwahahha, publicity na pud niya aron motaas iyang ratings!

Ang tawo gani puno sa hambog, ambot lang unsa ang iyang makab-ot. Kani si Willie, mao ni gikan sa ABS unya milayat sa TV5 kay siya naman ang magbuot sa management. Dili na magpatudlo o dili naman gud magpa-korihe.

VATSKI: Maayong adlaw, Gar, ug sa tanang mga loyalista sa Banatanay! December na gyud, di na kapugngan ang pag-abot sa Pasko. Ug sa ginaingon  mo na, Gar, murag di na sab gyud kapugngan ang pagbalhin ni Willie Revillame. Mao man nay gisulti niya nga mobalhin kuno siya, ug sa laing estasyon ba, wap-a ni niya gibulgar. Kay pwede biya nga mobalhin siya og laing industry sama sa pulitika o negosyo. Anyway, mao na’y giingun, dili gyud permanente ang tanan. Sama ni Willie, lain-lain lang ang estasyon. Basin sa GMA 7 na ni siya motabok, or basin gi-offeran ni siya og dako sa ABS-CBN. Kay sukad ra ba nawa si Willie sa maong network, tanang programa ang gipuli niini sa time slot ni Willie, puro na natigok. Basin dako gyud ang offer sa laing estasyon, Gar, unya si Willie kay talent ra man, ambak gyud kung asa siya mabuhong.

GARRY: Yabang gyud ni siya Vatski. Bisan pa man nakab-ot niya ang salapi apan naa gihapoy kahaw-ang sa iya kay dili man ma-kontento ug pabilin ang iyang garbo. Nakatan-aw man gyud ko ani iyang show, ambot lang dili naman wholesome uy. Halos maghubo nalang ang iyang mga back-up dancers aron lang gyud halinon ang shows. Mao ni atong ipanghambog?

Whether we like it or not Vatski, nindot na unta ang iyang estado sa ABS pero unsa man ang nahitabo, gihimo lang gyud niyang isyu si Joeberth Sucaldito aron maka-ober da bakod sa TV5.

VATSKI: Personally, di man gyud ko ganahan aning Willie, Gar, aw sa una katong di pa siya ana kasikat. Pero karon murag nidako na gyud ni iyang ulo. Pero sa giingun ko pa, at least vocal siya nga kutob nalang siya sa January sa Wil Time Big Time. Iyaha man pud na nga salida, so siya’y magbuot kung asa na niya dad-on. Mura ra gud na og peryahan, Gar, kung asa tong daghang tawo, mangadto na sila kay tua man didto ang kita. Basin sab og wa gyud naalagari og tarong sa TV5 si Willie. Kay kung ang tawo nga nabuhong, dili naman siguro moambak pa og laing puluy-anan. Sama gud katong didto pa sa ABS-CBN si Willie, okay ra man siya didto, hangtud nga gi-pressure siya sa maong estasyon. Murag gitratar nga usa ka-puppet and to think milyones na ang na-contribute niya sa ABS-CBN. Ug kay dako na lagi ni siya’g ulo, nag-ober da bakod dayun sa TV5. Karon, murag the same situation ang nahitabo. And wap-a ta kahibawo kung asa na pud ni siya motabok, huwat lang ta. Anyway, happy birthday sa atong editor nga si Ryan Mark. More power nimo, ug nanghinaot ko nga makaplagan na nimo ang imong dad-on sa altar sa kaminyuon. Ayee! Hahaha

Pangutana: Ngano kaha nga dili na ingon niana ka kusog ang show ni Willie Revillame sa TV5? Unsay imong opinyon hugyawnatic? I-text na kana, dungan sa imong ngalan ug address ngadto sa: 0917-9047513.

Kutob lamang karong udto (12 noon, December 2) ang pagdawat nato sa inyong mga mensahe. Ayaw taasa aron sigurado nga mapatik. Go go go!