Lagum nga bikini line

CEBU, Philippines - Hello ug maayong Domingo sa akong mga suki diri sa Anah Lang! Pasensya na sa mga naghuwat sa akong lindog sa mga niaging duha ka Domingo. Pwerteng busy-ha sa akong beauty ug wala gyud koy panahon nga makalingkod kadiyot ug makatubag sa inyong mga gipadala nga mga pangutana. Pero karon,  kay nabalik na ug excited na kaayo nga motubag sa inyong mga problema sa pagpagwapa, panamit, personality ug uban pa. Pero karong adlawa, naay usa ka pangutana nga gusto nakong paambitan kaninyo kay common kaayo kini ga problema ilabi na sa mga babaye.

Maayong Buntag Anna. Daghan na kaayo ka’g na-share nga beauty tips pero ask lang unta ko ani kaypaminaw nako mao jud ni akong problema. Unsaon man ni nako akong lagum nga bikini line ug buttocks? Tungod ba kini sa underwear nga akong gigamit or unsa ba? Hinaot tagaan ni nimo og pagtagad akong problema kay maulaw jud kaayo ko mag purol ug medyo mubo. Ako diay si Jack, 17 y/o from Mandaue.

Hi Jack! Interesting kaayo ni imong pangutana tungod kay kasagaran nag problema gyud niini. Ang hinungdan ngano molagum ug momarka ang panty o bikini sa sampot kay usahay tungod sa kadako sa lawas sa usa ka tawo, mopasnot ang imong panit sa imong paa mao na magka rashes. Ang uban pod, mahilig kaayo sa pagsul-ob sa mga polyester nga panapton sa sanina o purol. Kining klase sa materyal init sa lawas ug makadaot sa panit ilabina ana nga area. Ang paggamit usab sa mga huot kaayo nga mga panty o bikini ang hinungdan pod niini.

Para mominos ang kaitom o lagum niini, paglugod og usa ka slice nga lemon (American lemon o local lemonsito) sa lagum nga parte duha ngadto sa tulo ka minutos samtang naligo. Ang lemon makatangtang og mga patay nga skin cells ug makapalamdag sa mga dark spots. Makatabang usab ang pagsul-ob og made in cotton  nga mga panty nga dili huot sa lawas. Nindot kini nga panapton sa panit, dali mauga kung sington ka ug makalikay sa rashes. Sa dili pa ka matulog, pagmasahe og olive oil (mapalit kini sa supermarket, sa cooking oil section) sa apektado nga area. Makatabang kini sa pagkawala sa rashes ug makapa soft sa skin.

Pangutana para ni Anna? I-text kana, dungan sa imong ngalan ug address ngadto sa 0943-431-4567 sa dili pa ang 10a.m. karong adlawa, November 25, 2012.