Alessandra moundang na'g artista!

CEBU, Philippines - Daghan ang nahugyaw sa lenggua ni Alessandra de Rossi nga mu-undang  na siya pagka artista sa tukmang panahon gumikan kay napul-an na siya sa iyang mga roles nga mao ra gihapong dagwaya.

Suma pa sa Philippine Entertainment Portal nga mao ni pamahayag ni Alex dihang nahinabi sa press human sa grand launch sa "Pahiram ng Sandali" niadtong Martes sa gabii." Oo naman, definitely! Four years pa ang bahay ko, huwag kayong mag-alala!" niya pa.

Dili na matud pa siya malipayon, apan dili niya ma-explain o mahulagway ngano.

"Sana kung hindi pare-pareho ang ibinibigay sa akin, malalaman  kong magaling akong aktres.

"E, bilang iisa lang naman ang ginagawa ko, hindi na tuloy alam kung magaling ako o hindi, di ba?" natatawang sabi ni Alessandra, nga kadalasangmudala nga kontrabida roles sa mga teleserye," dugang pa niya.

Pero niya pa, mag-ihap pa og tuig usa siya manamilit sa showbiz gumikan kay nagbayad pa siya sa iyang balay. Napulo ka tuig siya nga magbayad sa maong balay ug nakabayad na siya og balig six years, busa upat na lay kuwang.

Ang Pahiram ng Sandali, teleserye sa GMA-7 nga magsugod na karong Lunes puhon sa primetime hulip sa Coffee Prince nga matapos na karong gabii. Bida niini sila si Dingdong Dantes, Max Collins, Lorna Tolentino ug Christopher de Leon.

Niining maong teleserye kabit ni Christopher ang role ni Alex, ug unang higayon kini nga nakaangkon og ingon niini nga role. Pero gibutyag ni Alex nga mihangyo siya sa production nga usbon gamay ang iyang character gumikan kay dili siya kumportabli nga kabit na, manggamit pa gyud.

Erich Gonzales kaslunon?

Engaged na si Erich Gonzales. Kini kun si Kris Aquino maoy pangutan-on.

Si Erich, usa sa mga guests ni Kris sa iyang programang Kris TV kagahapon sa buntag sa ABS-CBN, diin dihang nag-bake siya og cup cakes, misidlak ang diamond ring sa tudlo niini nga wala makaipsot sa mga mata sa Queen of All Media.

Igo lamang mipahiyum si Erich. Wala niya ihimakak ang gisulti ni Kris, apan wala pud niya angkona.

Miingon hinuon siya sa sinugdanan sa programa," I'm so happy and inspired."

Sa presscon sa iyang pelikulang Suddenly It's Magic bag-ohay lamang gisul-ob pud ni Erich ang maong singsing.

Dili pa lamang dugay giangkon pud niya nga non-showbiz guy ang iyang ka-date.

Doktor  na-top  sa KBP

Ang mananambag sa kahanginan nga si Dr. Randolph Libres maoy nag-una sa listahan sa mga topnotchers sa Kapisanan ng Broadcaster ng Pilipinas -Cebu Chapter Licensure Examination nga gipahigayon adtong October 14, diha sa University of San Jose Recoletos.

Si Dr. Randolph maoy nipuli sa mitaliwan na niya nga inahan nga si Dr. Lourdes Libres Rosaroso sa programang "Kini Ang Akong Suliran" sa dyHP sa Radio Mindanao Network.

Ang resulta sa examination nadawat sa mga station manager nagkadaiyang estasyon sa radyo nga sakop sa KBP niadto pang Nobyembre 15.

Samtang nagtabla sa ikaduhang pwesto sila si Diana Pauline Aleta  sa dyAC- Crossover 90.7 ug Razel Cuizon sa dyRC Radyo Calungsod.

Sila si Louie Panimdim sa dyNU -Win Radio ug Livi Esrael Dajime sa dyCD maoy anaa sa ikatulong dapit. Nahimutang usab sa ikaupat nga luna sila si Melody Rosales sa dyRF ug Jean Suarez  sa dyHP .

Nasulod usab sa Top 5 sila si Marvie Matura sa dyRF ug Brent Pleños sa dyXL 93.9 I-fm.

Ang ubang nakapasar sa nahisgutang eksaminasyon naglangkob nila ni Carmelo Caparos (dyFR), Mar Lester Arsolon (dyHR), Rachelle Sarmiento (dyRC), Ryan Christopher Sorote (dyRC), Laurence Anthony San Agustin (dyRC), Dianne Rachelle Cabahug (dyAC), Joven Arcelo (dyKI), Isaias Guisado (dyKI), Susana Ardoña (dyHP), Casmero Mahilom (dyHP), Wyclif Duran (dyXL I-fm), Robert Pabilaran (dyKC), Zaldy Ga (dyKC), Antero Garces (dyNU), Nanette Garong (dyLA), Alvin Ybañez (dyLA), Lea Angel Goyo (dyCD) ug Virn Villagracia (dyLL).

Ang mga nakapasar gikatakda nga manumpa sa sayong bahin sa sunod tuig.