Zoren at Carmina, kasal na!

MANILA, Philippines - Ganap nang mag-asawa sina Zoren Legaspi at Carmina Villaroel.

Kahapon ay kinasal sila sa isang Christian ceremonies na ginanap sa Fernbrook Gardens sa Las Pinas.

Tumayong ninong sina Mr. Felix Ang, Eric Quizon, John Concepcion,  ninang sina Grace Poe Llamanzares, Megastar Sharon Cuneta and Cory Vidanes ayon kay Tita Dolor Guevarra, manager ni Carmina.

Pero si Kris Aquino ay nag-post din sa kanyang Ins­tagram account ng tungkol sa kasalan. “Congratulations and best wishes Zoren and Carmina. Thank u for making me your ninang.”  

Kasama naman sa naging bisita sina Mother Lily Monteverde, Susan Roces, Gelli de Belen, Boy Abun­da, Candy Pangilinan, Joey Marquez, Zaijian Jaranilla, Amy Austria, Tirso and Lyn Cruz, Maricel Soriano at marami pang iba.

Matagal nang pinag-uusapan ang kasalan ng dalawa.  Walang masyadong press release bago naganap ang kasalan nila. May bilin sa mga bisitang ‘wag sasabihin ang naganap na kasalan.

Willie Revillame trip ang mga ex ni p-noy

After Shalani Soledad, at ngayon si Grace Lee, sino pa raw kayang ex ni Presidente Noynoy Aquino ang magiging co-host ni Willie Revillame sa kanyang variety show sa TV5?

Dinidiskubre tuloy nila kung sino pang mga ex ng presidente dahil baka sakaling magka-career din sa pagho-host.

Hindi naman daw puwede si Liz Uy dahil hindi naman sila naging official na mag-syota ng pangulo.

Sayang puwede rin sana si Liz. Maganda pa naman siya ngayon. Naging magkamukha na sila ni Ruffa Gutierrez.

Actually, hindi naman siya ganun kaganda dati. Parang may naiba.

Siguro sa make-up ni Ms. Liz kaya na­ging kamukha na rin niya si Ruffa.

Heart at chris May kakaibang gagawin

Simula Sabado (November 17), tunay na buhay ng mga taong may kakaibang mga trabaho dito sa Pilipinas at sa buong mundo ang handa nang ipakita ng pinakabagong infotainment program ng GMA 7, ang Wattajob!

Mula current events hanggang special features, bawat kakaibang trabaho ay siguradong pasok sa weekly list ng Kapuso heartthrob host na si Chris Tiu kasama si Heart Evangelista. Makakasama rin nila ang comedian na si John Feir.

Patutunayan ang halaga ng pagtitiyaga at dedikasyon, papasukin at susubukan na ng 45-minute program na ito ang mga hindi pangkaraniwan, madudumi, at delikadong mga trabaho.

Sa Sabado, makikita na kung anong panganib ang naghihintay sa isang babaeng nagrereport habang nasa isang cavern 250 below the ground sa South Dakota, USA. Madidiskubre na kung gaano kadelikado ang sundan sa gabi ang daan ng isang serial killer sa London at trabahong sumusubok sa takot ng isang tao sa mga matataas na lugar habang naghahanap ng isang kakaibang uri ng flora sa mga cliff ng Tagaytay.

Sumasaludo sa mga taong dumadaan sa mga hindi pangkaraniwang trabaho, mapapanood na ang Wattajob! simula November 17 pagkatapos ng Kapuso Mo, Jessica Soho sa GMA7.