Dekalidad ang “Di Ingon Nato”

MNNAOTW. Mga Ka Tribung BisChikadora! Kumusta ang inyong Kalag-Kalag? Nanghinaut ang inyong Yur’s truly nakapanagkot mo kung wala man nakapanalangin mo sa inyong mga minahal sa kinabuhi nga nipanaw na. Mapasalamaton ko nga tungod sa atong trabaho kay didto kami nanukad sa mga dagkong sam-ang dire sa Sugbo mao nga makadalikyat gyud ko og panagkot sa dakong krus. Karun magpadayon kita sa atong inadlaw-adlaw nga kinabuhi. Siyempre para sa unang Domingo sa Nobiyembre kuyugi ko ninyo kay akong ipaambit kaninyo ang mga nahitabo ug latest update dire lang sa BisChika!

Niaging semana kay tuhog ang show! Mao kini ang akong drama kay ang paglugwa nako sa Bohol dunay duha ka tuyo ug tumong. Una, ang imbitasyon ni Dominic Sy para sa presscon ug advance screening sa “ Di Ingon Ato “ (Not like us) nga gibidahan nilang Donna Gimeno, Mercedes Cabral, Rez Cortez ug Franco Reyes. Bisan pa man wala ko nakaabot sa advance screening sa dakong mall sa dakbayan pero natagaan kita og higayon nga maBisChika nako ang direktor  nga si Ivan Zaldarriaga ug Brandon Relucio kauban ang ubang print media people. Very intimate ang maong BisChika kay among napangutana si Direk Ivan sa ubang aspeto sa iyang kinabuhi. Sigon pa niya, gusto niya makatrabaho sa mga umaabot niya nga project silang Kim Chui, Joel Torre ug Cherrie Gil.  Dugang pa ni Direk Ivan sa mga mahiligon nga moarte sa telebisyon man o sa dakong screen ang iyang advice/ tips nga gihatag kay dapat duna kay  “guts” ug “ kahibalo ka sa imong character” para kung mo audition ka kay dili naka maglisod. Ug ang labing lisod nga pangutana sa maong presscon sa dihang nangutana ko niya og “ kumusta ang  lovelife?,” ang mubong tubag ni Direk kay “ loveless.“ Reaksyon ni The Freeman entertainment writer Vanessa Balbuena: Hahhahahahha!

Tuod man, wala namo sipyata ni Gleven “ Magdalena” Diaz ang higayon nga makatan-aw og Cebuano movie. First day sa showing niini, best in watching ang among show. Una, medyo okey lang ang mga eksena dunay higayon nga medyo hapit nako mag-concert (katulugon ) pero ang akong tupad kay nag-back up singer gyud si Gleven ( nakatulog ) mao nga ako siyang gipukaw. Talented kaayo kay hikapon pa lang makamata na dayon. Sa dihang ni ataki na ang mga zombies ang mga eksena, didto na nga naHugyaw ang mga nanan-aw nagsininggitay na kaming tanan kay unsaon na lang nila pag-ikyas sa mga dili ingon nato. Mo comment ko sa mga artista nga silang Rez Cortes ug Mercedes Cabral kay hugyaw lang ang ilang binisaya. Mas naHugyaw ko ni Franco Reyes kay lami ra pud siya mo acting bisan medyo biguti-biguti ang iyang nawong type nako siya. Hahahhahaha! Para kay Donna Gimeno bug-at ang iyang role, ganahan lang unta ko katong eksena nga nigakos na siya sa iyang papa nga si Rez Cortez nganong nahitabo kini sa ilang lugar,  mas dakong emosyon ang iyang gihatag, mas dunay mga luha nga ni dagayday sa iyang mga mata pero natagaan niya og justice ang iyang karakter. Ang nisidlak usab sa salida ang karakter ni Istoy nga si Jeff Ogario, ganahan ko makakita niya og balik  sa big screen  nga barumbado pero dunay kasingkasing ug siya na ang bida. Kudos usab ni Natnat nga cute kaayo, lami kaayo kumuton murag ako siyang anak kay butanding kaayo og lawas, ug sa mga nagdala sa papel nga mga zombies, makahadlok ug makasinggit gyud ka sa imong lingkuranan.

Busa unsa pa ang inyong gipaabot tan-aw na  sa SM City Cebu Cinemas  ug SM City Consolacion Cinemas kay hangtud kini November 06. Suportahan nato ang mga Cebuano movies  labi na ang salidang “ Di Ingon Nato. “ Dekalidad nga salida kay tiaw mo ‘na ang salida midaog isip Best Picture sa Macabre Internatal Film Festival 2012 sa Mexico City, Official selection of the Fantaspoa International Film Festival sa Porto Alegre, ug Official Selection sa Rojo Sangre Film Festival 2012 sa Buenos Ares.

Pagkahuman sa maong presscon sa “ Di Ingon Nato “ sa Bohol nakig BisChika ko sa akong mentor nga si Madam Lily Yap. Sa mubong panagkita nitikang na pud ko sa laing lugar sa Bohol kung asa kini, atangi sunod Domingo diri lang sa BisChika!