Aktor nagsisinungaling para magmukhang mabait at marunong tumanaw ng utang na loob

Nagsisinungaling ang aktor nang sabihin nito na okey ang relasyon nila ng kanyang manager.

Iba ang sinasabi ng aktor sa mga reporter dahil ang totoo, marami siyang reklamo laban sa talent manager na nagpasikat sa kanya.

Nagpapanggap ang aktor sa harap ng press para siya ang mabait at marunong tumanaw ng utang na loob. Tulad ng mga lumang kuwento sa showbiz, datung ang ugat ng problema ng aktor at ng kanyang manager.

Alyssa ayaw nang mag-drive!

Naayos na ng MMDA ang steel fence na nabangga ng sasakyan ni Alyssa Alano noong nakaraang buwan kaya wala na ang bakas na may aksidente na nangyari sa tapat ng isang mall sa Marikina City.

Nagpapagaling na si Alyssa sa kanyang bahay at kung kilala natin siya, siguradong gustung-gusto niya nang magtrabaho.

Malaki ang nagastos ni Alyssa dahil ipinagamot niya ang mga tao na kanyang nabangga.

Magbabayad din siya ng P100,000 sa MMDA para sa mga nawasak na steel fence.

Traumatic kay Alyssa ang aksidente na nangyari. Afraid na siya na magmaneho ng sasakyan kaya malamang na kumuha na siya ng personal driver.

Mabuti nang mag-hire si Alyssa ng driver kesa kinakabahan siya tuwing nagmamaneho.

Hindi naman siya si Gina Pareno na mala­kas ang loob na magpatakbo ng sasakyan, kahit naglalagare sa mga taping at shooting.

Nakakabilib si Gina dahil itsurang malayo ang location ng mga taping at shooting, siya ang nagmamaneho ng sariling sasakyan.

Sa susunod na magkita kami sa parlor ni Bambbi Fuentes, tatanu­ngin ko na si Gina kung bakit wala siyang driver eh can afford naman siya na magbayad ng monthly salary?

Taping ng Paroa napaboran ng malamig na klima sa Tagaytay

Sa Tagaytay City ang taping ng Paroa: Ang Kuwento ni Mariposa.

Hindi masyadong pagod sa taping ang mga artista at production crew ng Paroa dahil sa cool weather ng Tagaytay na may kalayuan pero perfect sa magdamagan na trabaho.

Ang Paroa ang bagong teleserye ng GMA 7 at sa November 5 ang pilot telecast nito. Starring sa Paroa ang loveteam nina Barbie Forteza at Derrick Monasterio.

Regine may package deal sa The Arena

Package deal pala ang anniversary concert ni Regine Velasquez sa The Arena sa November 16.

Package deal dahil may agreement ang The Arena management at ang produ ng concert ni Regine na maliban sa anniversary concert, ang The Arena din ang venue ng 2013 Valentine show ng Songbird. Pabor sa magkabilang panig ang package deal dahil kapwa sila makikinabang.

Wala nang free time si Regine hanggang sa November 16 dahil busy na siya sa rehearsals ng Silver at sa kanyang tatlong shows sa GMA 7, ang HOT TV, Sarap Diva at Party Pilipinas.

Paolo may pasabog

Watch ninyo ang Startalk ngayong hapon dahil ang pinakamaiinit na showbiz news ang aming ihahatid sa inyo.

Sasagutin ni Paolo Contis ang mga akusasyon ni Lian Paz laban sa kanya. Waiting ang marami sa mga pasabog ni Paolo sa Startalk.