Carina at Bea tinuluyan ng abogado!

Nangyari rin ‘yung iniisip ng marami na mangyayari sa hindi pagsunod ng mag-inang Carina at Bea Binene sa hinihinging apology ni Atty. Ferdinand Topacio sa kanila. Nagsampa na ang abogado ng pormal na reklamo sa mag-ina sa sinabi ng mga itong hindi nila siya (Atty. Topacio) legal counsel, na hindi sila hu­mingi ng pera rito at pati ang pagtulong niya sa pananakot sa kanila ng isang DJ sa radyo. Kulang sa anim na milyon ang hinihinging danyos ng abogado sa mag-ina na aniya ay dinumihan ang kanyang reputasyon at personalidad sa kanilang ginawa.

Akting ni Christian, hinuhusgahan

Maraming hindi magagandang review si Christian Bautista sa ginagawa niyang pag-appear sa teleseryeng Princess and I. Marami ang ayaw na maging kontrabida siya dahil hindi raw bagay sa kanya. Ito raw ba ang ipinagmamalaki niyang dahilan para naising lumipat ng network na nangakong magbibigay sa kanya ng mga acting assignments? Marami ang naniniwala he should stick to his singing.

Huwag naman kayong ganyan! Kung ayaw n’yo ang acting niya ngayon, wait until makatapos siya ng workshop. ‘Yang pag-arte naman ay napag-aaralan. Baka naman naninibago lang siya. Hindi ko pa kasi siya napapanood na umaarte sa Princess and I. Perhaps I should ask my maids of honor. Sila ang authority sa mga artista at palabas sa TV.

Juday hindi nag-e-expect ng award sa MMFF nina Bong at Vic

Engkantada pala ang role ni Judy Ann Santos sa pang-MMFF movie nila nina Sen. Bong Revilla at Bossing Vic Sotto. Bukod sa pagtanggi na sinulot niya ang role na intended for AiAi delas Alas, sinabi ni Juday na enjoy siya sa kanyang bagong trabaho. Bagaman at malayo siyang magka-award para sa kanyang role, okay na ito sa premyadong aktres na ang hangad lamang ay mamayani sa box-office ang kanilang pelikula.

Samantala, totoo ba na may problema pa na kinakaharap ang Thy Womb nina Nora Aunor at direk Dante Mendoza? Tutol ba sila na kasama rin ang Superstar sa El Presidente? Pero alam naman natin na si Gov. ER Ejercito ang talagang bida sa pelikula, special role lang si Guy na ‘di tulad sa pelikula nila ni Mendoza na talagang bida siya!