Three years na'ng single

Walay planong makigrelasyon

CEBU, Philippines - Walay proyekto sa ABS-CBN ug wala matud pay gisulti unsay iyang himuon sa musunod nga mga adlaw. Kini maoy giklaro ni Tin Patrimonio ngadto sa pipila ka sakop sa E-Group (Cebu Entertainment Group) adtong Sabado atol sa usa ka lamiang paniudto diha sa Lighthouse Restaurant sa Mango Avenue. Si Tin ug Divine Smith ang celebrity guests sa Gaisano Balamban Sakyanang Pangnegosyo promo final draw ug sa opening salvo sa usa ka buwan nga selebrasyon sa ika-19 nga birthday sa Gaisano Country Mall karong Oktubre.

Ang iyang amahan, ang basketball legend nga si Alvin Patrimonio, kinsa naguol kaniadto sa iyang pagsulod sa Pinoy Big Brother house kay gibiyaan man niya ang iyang tennis training, mao na matud pa ang nagdasig kaniya nga lugwayan pa ang iyang pasensya ug magpaabot lamang.

“Siguro iniisip ko na lang the positive way, kumbaga be patient. I don’t know,” nagkanayon si Tin o Anna Christine Conwi Patrimonio sa tinuod nga kinabuhi. “Maybe they are making plans, I don’t know,” dugang pa niya. Hinuon, aduna matud pa siyay acting workshop.

Gawas sa pag-guest niya sa pipila ka mga shows sa ABS-CBN, kasamtangan usab siya nga nagtungha karon sa National University sa kursong AB English. Pero plano niya nga mu-shift og kursong marketing o HRM. “I love food, I wanna learn how to cook then. Marketing because..siguro nakaka-enhance then sa acting at pagsasalita. Speaking, that what I need,” niya pa. Ganahan siya mag-masscom, apan wala gitanyag ang maong kurso sa nahisgutang unibersidad. Dili siya mahimong mu-transfer og laing tunghaan gumikan kay may scholarship matud pa siya gikan sa nanag-iya sa maong unibersidad, ang negosyanteng si Henry Sy. Tennis varsity siya sa maong tunghaan. Si Jericho na lang matud pa sa kanhi niya mga housemates ang duna siya’y komunikasyon. Si Biggel usahay mu-text pud niya. Wala siya’y uyab karong panahona ug wala matud pa siya’y plano nga musulod og bag-ong relasyon.

Giangkon niya nga may naka relasyon siya nga sikat nga basketbolista sa UAAP, diin milungtad matud pa og tulo ka buwan ang ilang relasyon apan dugay siya nga gipangulitawhan niini. Tulo ka tuig na siyang walay uyab. Spanish ang una niyang boyfriend nga tennis player pud.

Nagdumili siya pagbutyag sa ngalan sa iyang ex-boyfriend, apan niya pa nasayud matud pa ang kadaghanan kinsay iyang buot pasabot.

“Everyone knows I think….athlete, sikat ngayon (sa) college basketball,” suma pa niya kabahin sa iyang ex-boyfriend. Dihang gi-ingnan nga pangitaon sa internet aron masayran kinsay iyang uyab, mitubag siya og: for sure makikita mo yun. Pwes, dihang gipangita sa Banat News Hugyaw pinaagi sa search engine nga yahoo.com ang sikat nga basketbolista nga nalambigit kang Tin, ang ngalan ni Kiefer Ravena ang migawas. Anak siya sa sikat pud nga basketball player kaniadto nga si Ferdinand "Bong" Ravena, ug sa inila nga volleyball player nga si Mozzy Ravena. Si Ravena o Kiefer Isaac Crisologo Ravena usa sa mga star players sa Ateneo Blue Eagles, kinsa migawas na usab sa nagkadaiyang TV commercials. “Good thing na rin na nag-break-up kami kasi I wanna focus on my career and my self first,” niya pa kabahin sa maong relasyon.

Close to her Heart: Mga empleyado sa Lighthouse Restaurant-Mango nagpahulagway uban sa kanhi PBB housemate ug Sugbuanong si Divine Smith, human sa usa ka lamiang paniudto diha sa maong restaurant adtong Sabado. Suma pa ni Divine mapasalamaton siya sa nahisgutang restaurant gumikan kay rason kini nganong nahimugso siya niining kalibutan. Nasayran nga kanhi diay empleyado sa Lighthouse Country Mall ang iyang inahan ug diha kini makaila sa iyang amahan. Kasamtangan siya nga atua karon sa Manila aron atimanon ang iyang gitinguha nga debut album, diin siya maoy nagsuwat sa mga kanta ug American singer ang mubutang og tono. Susama matud pa og genre sa mga kanta ni Chris Brown ang iyang gitinguha nga album, sanglit active matud pa siya nga tawo ug ganahan mubisita og mga dance clubs. Nalingaw pud matud pa siya og design og tattoos. Gani may gidesenyo matud pa siya nga tattoo para kang Matteo Guidecelli, apan wala siya masayud kun tugtan ba ang Fil-Italian ug Cebuano actor sa manager niini.