Bokalista ipapakita ang mga alagang tarantola

MANILA, Philippines -  Kikilalanin ni Kuya Kim Atienza ngayong Linggo (Oct. 7) sa Matanglawin ang mga exotic pet lover o mga taong nag-aalaga ng mga mababangis na hayop sa kanilang bakuran tulad ng ahas, alakdan, at buwaya.

Isa sa mga ito ang bokalista ng bandang 6Cyclemind na si Tutti Caringal na merong 24 alagang tarantula.

Papatunayan din ng Trivia King na ang pagiging exo­tic animal lover ay para sa lahat matapos niyang kapanayamin ang mag-amang Peewee at Trisha Nicolas na ang paraan para mag-bonding ay pag-aalaga ng ahas. Tatlong taong gulang pa lang noon si Trisha nang naging kaibigan niya na ang alagang mga ahas ng kanyang ama. 

Hindi tulad ni Trisha, medyo may edad na nang nagkahilig si Rey Lazaro sa exotic na mga hayop. Kaya naman para makabawi ay minsan inuuna niya pang alagaan ang monitor lizard niya kesa sa sarili. 

Pawn Stars at Kings of Restoration mas Pinaaga na!

Matapos ilunsad ng GMA News TV noong nakaraang buwan, naging patok sa mga manonood ang back-to-back reality series Pawn Stars at Kings of Restoration. Kung napapanood ito noon sa hapon, nasa early primetime na ito simula ngayong Linggo.

Tampok sa Pawn Stars ang Las Vegas pawn shop na pinamamahalaan ng tatlong henerasyon ng pamilya Harrison – ang lolong si Richard, ang anak na si Rick at ang apong si Corey.

Ngayong Linggo, magdedesisyon si Corey na bumili ng isang bangka. Matagal nang pinagbawalan si Corey na bumili ng ganito dahil batay sa kanilang karanasan ay hindi naging ayon sa kanilang negosyo. Bibilin ni Corey ang bangka nang hindi ito nate-test drive na lalong ikakagalit ng kanyang ama. Mapatunayan kaya ng pinakabatang Harrison na tama ang kanyang desisyon?

Samantala, sa Kings of Restoration tampok si Rick Dale at ang kanyang crew sa Rick’s Restorations na ibinabalik ang mga luma at basura nang gamit sa dating ganda nito. 

Ngayong Linggo, challenge para sa team ni Rick na muling pagandahin at paganahin ang isang refrigerator na matagal nang nakababad sa labas ng bahay ng ilang dekada! Alamin kung gagana pa ang 1950s ref na ito sa Kings of Restoration.