Uyab ni Iza ex ni Liz?

CEBU, Philippines - Gihimakak ni Iza Calzado ang tsika nga kanhi nakarelasyon ni Liz Uy ang iyang uyab karon nga Filipino-British nga si Ben Wintle. Ang tsika mao nga ex-boyfriend ni Liz si Wintle mga duha ka tuig na ang milabay. Apan matud ni Iza sa balita sa www.getitfromboy.net nga nakasiguro siya nga managhigala lamang sila si Uy ug Wintle gumikan kay niadtong panahona, may Russian girlfriend ang iyang hinigugma karon. Suod lamang matud pa nga managhigala sila si Liz ug Wintle. Hingpit na nga gipadaylang ni Iza sa publiko ang iyang boyfriend pinaagi sa 2012 Esquire Ball adtong Martes sa gabii sa Shangrila-Makati.

Human sa drama Nicki ug Mariah nahusay

Nagpinasayloay na matud pa sila si Mariah Carey ug Nicki Minaj hinungdan nga nahinayon na ang nahunong nga auditions sa Americal Idol didto sa Charlotte, North Carolina kagahapon.

Nagkauyon na matud pa ang duruha nga kalimtan na ang nahitabo.

Nasayran nga sa audition niadtong milabay nga adlaw sa maong dapit nagkasumpaki ang duruha sa ilang mga komentaryo sa usa ka contestant, nagtinubagay matud pa sila nga misampot sa pagpanghulga ni Nicki kang Mariah, gawas nga labihan niining nakayawyaw. Gani, mihukom ang mga producers sa reality show nga putlon una ang audition hangtud nga dili mahusay sila si Mariah ug Nicki.

Kagahapon sa pagpadayon sa audition, “civil ug professional” matud pa ang tinagdanay sa duruha. Nasayran nga ang rason gyud sa kalagot ni Nicki mao ang pamahayag matud pa ni Mariah nga diskumpyado siya sa pagkalakip sa nahauna isip judge kay basin mahimo silang kataw-anan. Kuwang matud pa ang kabangkaagan ni Nicki.

GMA-7 ug TV5 Dili mahinayon ang “merger”

Dili na mahinayon ang nabaniog nga panaghiusa og pwersa sa TV5 ug GMA-7. Kini human gipahibawo kagahapon sa GMA-7 nga gihunong na ang negosasyon tali sa MediaQuest Holdings Inc. (Mediaquest) ug sa major shareholders sa GMA Network, Inc. (GMA) alang unta sa maong tinguha. Ang Mediaquest gipanag-iya sa PLDT retirement fund diin ang chairman niini mao ang negosyante nga si Manny V. Pangilinan. Suma pa sa pahibawo nga gipadangat sa GMA-7 kagahapon sa buntag wala matud pa magkasabot ang duha ka mga habig. “The parties have been unable to arrive at mutually acceptable terms despite the continual discussions and efforts exerted in good faith,” tipik sa official statement gikan sa GMA-7 nagkanayon. Dungan niini, giklaro ni GMA Network Chairman and CEO Atty. Felipe L. Gozon nga dili presyo maoy rason sa napakyas nga negosasyon. “The issues that the parties were not able to resolve had nothing to do with the price.” “If there is a serious offer in the future, then we are willing to consider.” Nasayran nga sa milabay nga tuig pa nagsugod ang panagsabot-sabot alang unta sa “merger” sa mga Kapuso ug Kapatid.

Istoryahe Maja

Nagpaduding si Maja Salvador atol sa presscon sa teleserye nga Ina, Kapatid, Anak kabahin ni Enchong Dee: “Mag-swimming lang siya, attracted na attracted na ako sa kanya.” Midugang pa siya sa pag-ingon: “Sa swimmer naman ako ngayon, tapos na ko sa triathlon.” Ang kanhi uyab ni Maja mao ang triathlete nga si Matteo Guidicelli samtang si Enchong nahimong champion swimmer ug nalakip sa Philippine national swimming team ug misalmot pud sa SEA Games ug sa Asian Games. Sila si Maja ug Enchong maoy magpares sa Ina, Kapatid, Anak nga magsugod na karong October 8, kauban usab sila si Xian Lim, Kim Chiu, ug ang mga banggiitang sila si Cherrie Pie Picache, Ariel Rivera ug Janice de Belen.

Balik trabaho na

Wa pa maka taping si Steven Silva para sa Coffee Prince sanglit bag-o pa lamang siya nakabalik og trabaho human siya na-ospital gumikan sa dengue.

Angkona na uyy!

Maayong higala lamang gihapon ang paghulagway ni Aljur Abrenica kang Kylie Padilla bisan pa man sa nagkagrabeng pagduda nga uyab na gayud silang duruha.

Paspasa ra ah

Dili na matud pa matago ang labihan nila ka suod karon ni Maxx Collins ug Benjamin Alves sa set sa Coffee Prince. Daghan ang nagtuo nga dili magdugay magkauyab gayud ang duruha.

Dili lagi gimik

Subling namahayag si Xian Lim nga dili matud pa pang-publicity ang namugna nga kasuod karon nila ni Kim Chiu. Xian Lim says about his sweet gestures for Kim Chiu: "Hindi naman namin ginagawa para sa publicity. “Pinagtagpo kami ng destiny, sabihin na natin, nandiyan na, magkaibigan na kami. It’s one continuous getting to know each other."

Sorry

Mitambong si Albie Casiño sa 2012 Esquire Ball ug miluwat siya og mensahe nga nagkanayon: “Lahat ng haters na galit sa akin, sorry.” Mibalik pagtungha si Albie, diin mikuha siya og kursong Export Management sa College of St. Benilde.

Paabot lang gyud

Wala matud pa magdali si Toni Gonzaga nga maangkon ang Box- Office Queen title gumikan kay maangkon ra gyud matud pa kini niya sa tukmang panahon. Adunay pelikula si Toni kauban sila si Luis Manzano ug Vice Ganda, This Guy’s Inlove With You Mare.

Chris Tiu nayayay

Dismayado ang basketball heartthrob nga si Chris Tiu sa una niyang duwa sa PBA isip sakop sa Rain or Shine adtong Miyerkules, gumikan kay sayo kaayo siya nga nabangko, sanglit nahiagum siya og injury.

Nasayran nga human niyang naka-score sa tungatungang bahin sa second quarter sa ilang game batok sa Petron Blaze adtong Miyerkules didto sa Smart Araneta Coliseum, mihangyo kini nga mu-undang na. Hinay-hinay siyang migawas sa korte paingon sa bench ug wala na makabalik pa. Suma nga na-injury ang iyang wala nga hamstring. Sa balita sa Spin.ph si Tiu mipadayag sa iyang pagka dismaya gumikan kay sayud matud pa siya nga naghinamhinam ang mga tag-iya sa ilang team ug mga fans nga makita siyang muduwa.

Matud pa nga hayan, dili makabalik pagduwa si Chris sa musunod nga tulo ka games sa ROS. “I just have to go back and have my therapy and make sure my left leg heals well before I go back and play.

"I really need to be patient and be persevering,” niya pa ngadto sa SPIN.ph.

Sad ending?

Unsay katapusan sa panaghigugmaay ni Elize (Louise delos Reyes) ug Tisoy (Alden Richards) karong gabii sa hingpit nga pagtak-op sa ilang love story sa One True Love sa GMA-7?

Unang giplano nga mulungtad lamang unta og 10 ka semana, kanunay kini nga gilugwayan gumikan sa taas niini nga rating nga naghatod usab kanila ni Alden ug Louise ngadto sa tumang kabantog, gumikan kay nagkadaghan matag adlaw ang mipakpak, mihilak, nalipay ug naguol sa dagan sa istorya sa ilang gugma. Suma pa nga ang finale karong gabii, sigurado nga mukunis-kunis sa pagbati sa mga nagsunod sa One True Love. Makita kini human sa Luna Blanca.

Tinuod o Paukyab?

Gipaabot karon ang pagtingog ni Angel Locsin kabahin sa intriga nga nagnilabad siya didto sa Japan atol sa photo shoot sa usa ka magazine nga padung pa nga ipagawas.

Ang tsika mao nga ang gikatahong pagnilabad ni Angel ngadto sa mga staff sa magazine agi og bawos, gumikan kay wala matud pa sila mituman sa ilang saad nga siya maoy himuong cover sa milabay nga anniversary issue. Apan bwelta sa kampo sa maong magazine mao nga wala matud pa silay gisaad ngadto kang Angel nga anniversary cover.

Ang mas detalyado nga istorya kabahin sa maong intriga kabahin ni Angel nga gisumsuman na karon og maayo sa mga netizens mao nga weekend photo shoot ra gyud unta ang plano sa magazine.

Apan mi-request matud pa si Angel nga musayo og usa ka adlaw sa gitakdang adlaw sa pagbyahe kay buot kining mag-shopping, busa gi-adjust sa magazine ang budget.

Pero mipadayon pa gyud matud pa kini og shopping og duha ka adlaw hinungdan nga napanguyawan na ang staff sa magazine gumikan kay magdugo na ilang budget sanglit wala masunod ang ilang schedule.

Dihang hingpit na nga mibutho matud pa si Angel sa set, lisud matud pa kaayo kining ikatrabaho. Dihang kinahanglan kining mag-ilis, wala matud pa kini misugot nga sa powder room lang sa restaurant, bisan pa og labihan niini ka limpyo ug ka komportabli para niya. Mi-insister matud pa ang nahisgutan nga adto siya sa karaoke bar mag-ilis ug midemanda nga mag-taxi paingon sa dapit bisan pa og malakaw ra.

Sa photo shoot wala matud pa ang atensyon niini sa iyang gibuhat nga nakapa stress sa production staff sa maong photo shoot.

Sa katapusang adlaw nila sa Japan wala pa silay napilian nga nindot nga hulagway busa, mihukom matud pa ang grupo nga mag-photo shoot sa lobby sa hotel. Pero nagsige matud pa og reklamo si Angel kay may mitubo nga kulot niya nga buhok nga kinahanglang ipa-straight. Mibalibad matud pud matud pa kini nga magpamake- up, hinungdan nga misinta na ang make-up artist nga wala na makaantos sa pagka reklamador sa actress, nga maoy nakapabatyag ni Angel nga nasuko na niya ang staff.

Isip paghusay sa sitwasyon, nagpa-deliver matud pa si Angel og pagkaon para sa tanan apan walay mikaon. 

Ang ending mao nga wala matud pa silay klarong mga hulagway nga nakuha bisan sa ila na nga pagbalik dinhi sa nasud. (BANAT NEWS)