Kailan lang na-realize na hindi nga sila talo, Toni niligawan din ng bading

 Kakatuwang malaman na naligawan na rin pala ng bading si Toni Gonzaga. Nung nagsisimula pa lamang daw siya sa kanyang pag-aartista. Bagaman at ayaw sabihin ng aktres ang identity ng nasabing manliligaw niya, ipinasya na lamang niyang magsawalang kibo dahil hindi rin naman niya alam noon ang totoo. Nito na lamang nagkahiwalay sila at napatunayan niya ang kasa­rian ng kanyang naging manliligaw at saka pa lamang niya finally tinanggap na hindi nga sila talo.

Annabelle nanahimik!

Wala yata akong ingay na naririnig mula kay Mama Annabelle Rama. Lalo na ngayon nakumpirma na tuloy ang pagtakbo niya sa pulitika. Parang bingi sa ginagawang pagkalampag sa kanya ng kanyang mga makakalaban ang asawa ni Eddie Gutierrez.

Hindi mo nga mamemenos ang popularidad ng matapang na ina at manager ng ilang artista. Magagawa siyang maipanalo ng kanyang mga anak at protégé. Kaya ‘wag n’yo siyang maliitin. Hindi niya kinakailangang maging ge­nius o abogado para matutunan niya ang trabahong kanyang pinapasok.

Bea protektado ng GMA

Nakikialam na ang Kapuso Network sa kaso ni Bea Binene laban sa isang radio jock at sa isang abogado na itinalaga ang sarili para tulungan si Bea.

Dapat lang dahil artista nila ito. Hindi gugustuhin ng network na masayang ang mahabang panahong ginugol nila para ma-establish at mapasikat ito. Bukod sa paglalabas ng istasyon ng pormal na pahayag para maklaro ang stand nila sa kasong kinakaharap ni Bea, nagpatawag na rin sila ng presscon para maipaliwanag ng mga abogado ng batang aktres ang kanyang panig sa mga ibinibintang sa kanya. Para sa isang mag-kikinse ayos pa lamang, may pagka-grabe na ang isyung kinasangkutan nito. Pero marami ang nagsabi na dapat ay present si Bea at ang kanyang ina sa nasabing presscon.

Bela naunahan ni Daniel

Ang dami nang nag-aabang ng Magdalena ni Bela Padilla. Bagaman at nauna itong nag-artista kay Daniel Padilla, mabilis ang pag-angat ng career ng mas nakababatang artista. Wish nila na sa pagiging bida ni Bela humabol ito sa kasikatan ni  Daniel.