Kathryn gitambagan ni Gretchen

CEBU, Philippines - Mihatag og love advice si Gretchen Barretto ngadto sa kauban niya sa seryeng "Princes and I" nga si Kathryn Bernardo.

Giingnan niya si Kathryn nga suwayan og research sa iyang kinabuhi aron dili kini mapareha kaniya.

Aminado si Gretchen nga duna siya’y mga kasaypanan nga nabuhat kaniadto. Samtang gibutyag sa aktres nga malipayon siya nga nakauban niya si Kathryn sa maong serye. “I have to admit, noong umpisa sabi ko anong gagawin ko sa mga batang ito, Hindi ko alam, para lang kaming magkakaedad. Feeling ko 16 lang ako or 17. The energy sa set is really up there in the sky,” suma pa sa aktres. Nagmaya usab ang aktres gumikan sa kakusog sa Princess and I busa hagbay ra nga nawala ang iyang kahiubos sa dihang wala madayon ang serye niya kaniadto nga Alta.

“Sa last interview natin umiiyak ako na hindi natuloy ang ‘Alta.’ Sabi ko I’ll just trust. Even if it’s so difficult, you just have to trust. Now I see the power of God,’’ tsika pa ni Gretchen.

Base sa latest data sa Kantar Media niadtong September 19, ang Princess and I nakaangkon og 40% national TV ,samtang ang kaatbang niini nga "Aso ni San Roque" sa GMA-7 aduna la’y 15.3%.

Jessica gimingaw dayon sa uyab

Bisan pipila pa lang gani ka adlaw nga wala magkita, gimingaw na dayon ang American Idol runner-up nga si Jessica Sanchez ngadto sa iyang uyab nga si Deandre Brackensick kinsa usa usab ka kanhi finalist sa AI.

Nasayran nga magpabilin si Jessica dinhi sa Pilipinas sulod sa pipila ka adlaw aron asikasohon ang iyang mga endorsements.

Giingong nakabalik na ang uyab ni Jessica sa Amerika human sa malampuson nga American Idol concert sa miaging semana. Sa iyang Twitter account, gibutyag sa singer nga gimingaw na siya pag-ayo sa iyang boyfriend ug sa iyang Idol family. "I miss @BrackensickAI11 :/ I miss my idol family :(," tweet pa ni Jessica.

Panglantaw ni Luis

Masaligon si Luis Manzano nga magmalampuson gyud ang pelikula niya sa Star Cinema nga “This Guy’s In Love with U, Mare!” gumikan sa presensya nila ni Toni Gonzaga ug Vice Ganda. Nasayod ang aktor nga puros nagmalampuson ang nangagi nga mga movie projects nila ni Toni ug Vice busa dako ang iyang pagtoo nga mao gihapon kini ang mahitabo karon. Nagkanayon si Luis nga na-enjoy siya pag-ayo atol sa shooting sa maong pelikula.