Shamcey magminyo sa 2013
CEBU, Philippines - Napanglantawan na sa beauty queen nga si Shamcey Supsup nga sa sunod tuig na sila magpakasal sa iyang uyab.
Suma pa ni Shamcey nga komportable na siya ug ang uyab nga si Lloyd Lee nga mopaso sa altar sa kaminyoon.
Gibutyag kini sa beauty queen sa programang Kris TV kagahapon sa buntag. Ang mag-uyab ganahan nga mahimo nila nga ninang ang TV host/actress nga si Kris Aquino busa dali dayon nga mitubag ang TV host og, “Oo naman. It will be my honor and privilege. Basta give me the date para ma-block off natin.” Giklaro usab ni Shamcey nga dili pa sila engaged ni Lloyd ug "promise ring" lang ang kasamtangan niya nga gisuot karon sanglit simbolo kini sa panaghigugmaay nila sa usag-usa.
Dugang pa ni Shamcey nga taud-taud na gyud niya nga giampo nga maabot na ang iyang ideal man busa mapasalamaton siya sa kahitas-an nga naabot si Lloyd sa iyang kinabuhi. Gusto sa beauty queen ang intimate wedding kung diin ang pamilya lang nila og soud nga mga higala ang makatambong sa seremonya.
Mistress P100M na
Mikita sa kapin sa P100 million ang pelikulang The Mistress sulod lang sa lima ka adlaw nga pagpasalida niini sa mga sinehan busa nagmaya pag-ayo ang mga bida niini nga sila si John Lloyd Cruz ug Bea Alonzo. Gituohan nga mosaka pa kini samtang nagdagan ang adlaw.
Edgar isip bayot
Dalhon ni Edgar Allan Guzman ang karakter nga closet gay sa “Maalaala Mo Kaya” karong Sabado, September 22. Makauban ni Edgar sa maong episode sila si Lito Pimentel, Jobelle Salvador, Eda Nolan, Ryan Boyce, David Chua, Bryan Homecillo, Art Mendoza, Joseph Bitangcol, ug Quintin Alianza.
Uma mikondenar sa video
Gikondenar sa kanhi PBB housemate nga si Uma Khouny ang anti-Islam video nga Innocence of Muslims nga matud pa aduna na’y 10 million hits sa Youtube. Ang maong video gihulagway niya nga miinsulto sa founder sa islam nga si Prophet Muhammad.
Magpares og balik
Malipayon kaayo si Jestoni Alarcon gumikan kay subli nga masaksihan sa publiko ang chemistry nila ni Rita Avila sa telebisyon pinaagi sa serye sa GMA-7 nga Sana Ay Ikaw Na Nga. Magka-love team kaniadto ang duha kadaghan na nga higayon nga nagpares sila sa mga pelikula.
Marian nagpanikad na
Naghinam-hinam na si Marian Rivera sa Pinoy adaptation sa Koreanovela nga Temptation of Wife. Magsige og hilak si Marian sa maong serye butang nga gipangadaman niya pag-ayo. (Sanden J. Anadia)
- Latest
