Ang pagbalik ni Pepito Manaloto

CEBU, Philippines – Banhawon sa GMA Network ang family sitcom nga Pepito Manaloto sugod karong September 16 ug giingong lahi kini kumpara sa miaging season.

Ang Pepito Manaloto, Ang Tunay na Kuwento nga magpakita sa ordinary lang nga tawo apan nakabaton og suwerte sa kinabuhi.

Sama sa naandan, ang komedyanteng aktor gihapon nga si Pepito Manaloto maoy modala sa karakter ni Pepito Manaloto.

Pagabituonan usab kini nila ni Manilyn Reynes isip Elsa Manaloto, Angel Satsumi isip Clarissa Manaloto ug Jake Vargas isip Chito Manaloto.

Aduna pu’y espesyal nga partisipasyon niini sila si John Feir isip Patrick, Ronnie Henares isip Tommy, Mosang isip Baby, Janna Dominguez isip Maria, ug Arthur Solinap isip Robert.

Mikompleto sa listahan sila si Jessa Zaragoza isip Deedee ug Nova Villa isip Mimi.

Gikatahong nagsagol-sagol ang mga karakter sa maong sitcom ug mao kini ang hinungdan nga gikahinaman kini pag-ayo.

Alma miatras sa senatorial race

Dili madayon si Alma Moreno sa pagsalmot sa senatorial race sunod tuig ug usa sa gituohan nga rason niini mao ang sakit niya nga multiple sclerosis. Giingong gitambagan ang actress nga dili magpalabi og hago sa iyang lawas.

Sarah mitiyabaw sa concert

Giingong puwerting hilaka ni Sarah Geronimo sa dihang giawit niya ang iyang last song sa concert dili pa lang dugay sa usa ka casino sa California. Giingong na-intriga ang nanan-aw niini ug daghan na hinuon ang nagduda nga wala pa ka-move on ang singer kang Gerald Anderson.

Fantasy couple

Gitawag karon og Fantasy couple ang magtiayong Paolo Contis ug Lian Paz gumikan kay puros mga pantaserye ang tagsa-tagsa nila ka mga proyekto karong panahona. Nalakip si Paolo sa bag-ong pantaserye sa GMA-7 samtang si Lian makita usab sa Enchanted Garden.

Janna nakabalik na

Balik trabaho na si Janna Dominguez pinaagi sa programang Manny Many Prizes human manganak upat ka buwan na ang milabay. Tsika pa ni Janna nga gimingaw na siya pag-ayo sa showbiz apan malipayon na usab siya karon sa iyang istado isip usa ka inahan.   

Little Champ

Si Piolo Pascual maoy mokanta sa theme song sa bag-ong drama-fantaserye sa ABS-CBN nga “Little Champ” . Ang maong kanta nag-ulohan og “Kung Kailangan Mo Ako” ug usa kini sa mga kantahon ni Piolo sa “ASAP 2012” karong Domingo.

Prince nahuwasan

Tsika pa ni Prince Stefan nga dili siya reklamador nga pagkatawo busa miresulta gyud ang iyang taud-taud nga pagpinaabot og proyekto sa GMA-7. Nalakip ang aktor sa umaabot nga serye sa GMA, ang Magdalena.

Jolo mag-bise gobernador

Human misilbi isip kapitan sa usa ka barangay didto sa Bacoor , nagplano na usab karon si Jolo Revilla nga modagan pagka-bise gobernador sa Cavite karong umaabot piniliay sunod tuig.