"P"

“It’s a showcase of Cebuano artistry, from music, art to acting performance, tanan na—a collection of Cebuano culture.”

Kini maoy tubag ni award-winning Cebuano film director Remton Siega Zuasola, dihang gipangutana unsay kalainan sa iyang himuong Pedro Calungsod movie, sa uban pang mga mugna nga may samang tema. “P” ang titulo sa iyang version.

Si Zuasola, kansang feature film, Ang Damgo Ni Eleuteria, nahimong Best Screenplay ug naghatag kaniya og Best Director sa prestihiyosong Gawad Urian adtong 2010 ug Best ASEAN Film niadtong 2010, mibutyag nga himuong matinud-anon gayud ang paggama nila sa maong pelikula.

“We want to portray it as authentic as possible from the costume. We want to portray it as human as possible. We won’t sugarcoat, masayop siya (Calungsod), naa siya’y weaknesses, how he stood his ground amidst the temptation during the mission,” nagkanayon si Zuasola, kinsa nakadawat sa Special Jury Prize atol sa Jeonju Film Festival didto sa Korea, sa milabay nga tuig para gihapon sa pelikulang Eleuteria.

Si Zuasola kinsa usa usab ka sacristan kaniadto mibutyag nga high school pa lamang siya, dihang una siya nga nasayud kabahin kang Beato Pedro Calungsod niadtong nakabasa siya kabahin sa kinabuhi niini. Niadtong tungora, nangandoy siya nga ugma damlag makabaton siya og kahigayonan nga makahimo og pelikula kabahin sa Bisayang umaabot nga santos.

Buot matud pa niya nga gamiton ang pelikula aron mas mailhan pa si Beato Pedro sa kadaghanan, hinundan nga may tipik sa maong proyekto nga ipasibo sa modernong panahon karon. May mga eksena usab sa pelikula diin mukanta ang mga characters, hinungdan nga namili na sila karon og mga kantang Bisaya ug ginama sa Sugbo nga maoy ilang ilakip niining maong proyekto.

Dungan niini, dako ang pasalamat ni Zuasola ngadto sa tag-iya sa SHE (Susan Henry Entertainment) Production nga si Susan Henry gumikan sa nag-awas nga suporta niini sa nahisgutang proyekto nga sugdan na paghimo karong Oktubre dinhi sa Sugbo, ug muabot sa Roma, alang sa canonization mismo ni Beato Pedro. Karong Abril sunod tuig, atol sa unang piyesta ni Calungsod isip santos, ipasalida ang maong pelikula nga may titulong “P.”

Si Henry sa iyang bahin, masaligon nga aduna siya’y lig-on nga pelikula gumikan kay aduna na siya’y banggiitang direktor ug lig-on nga mga artistang maglangkub sa maong proyekto. Gumikan niini, miingon si Henry nga dili niya igsapayan pilay iyang magasto niining maong proyekto, sanglit buot usab niya nga matabangan ang Cebuano movie industry. Aminado siya nga dakong risgo ang maggama og pelikula apan dako siya og pagsalig sa iyang mga katrabaho.

“I would want to revive the Cebu film industry so that they won’t go to Manila anymore. I really want to help these people (Remton ug mga kaubanan),” nagkanayon si Henry kinsa lumad nga taga Borbon, apan atua na sa Amerika magbase diin aduna siya’y mga healthcare facilities didto.

Apil niining maong pelikula sila si Angel Aquino, Matteo Guidecelli ug usa ka sikat kaayo nga male actor nga dili pa mahimong nganlan pagkakaron gumikan kay nagpadayon pa ang negosasyon. Apil usab niini ang mga Sugbuanong singers nga sila si Akiko Solon ug Jay-R Siaboc kinsa mga produkto sa reality shows sa ABS-CBN. Aduna usay importanteng papel dinhi si Donna Gimeno, ang nagdala sa papel nga Eleuteria. Samtang ang napili nga Beato Pedro Calungsod mao si Eli Razo, usa ka architect, theater actor ug acting scholar sa International Academy of Film and Television diha sa Mactan.

Gihulagway ni Zuasola si Razo isip “very good actor” kansang dagway haom kaayo sa gipangita sa pelikula.

Dungan niini, misaad si Zuasola nga lahi matud pa nga Matteo ang makita dinhi sa “P” sanglit usa ka rocker ang role sa Sugbuanong actor.

Sa pikas bahin, gibutyag ni Zuasola nga damgo niya kaniadto pa nga makatrabaho si Angel, hinungdan man gani nga gikomedyahan siya sa presscon kagahapon nga “na-starstruck” siya sa aktres, nga iyang gisakyan pinaagi sa pag-ingon nga mao kana ang rason nganong dili siya mutan-aw niini samtang nagsulti, ilabi na nga nagtupad lamang sila.

Si Angel miingon nga kun si Zuasola nag-idolo niya, siya usab “fan” og mga real talent, kinsa sa interview human sa presscon miingon nga wala pa siya makakita sa pelikulang Eleuteria, apan daghan na siya og nabasahan nga maayong reviews kabahin niini.

“I got very excited, especially that I heard about it and I had friends in Cebu,” nagkanayon si Angel, kansang role sa P usa ka “successful and sophisticated plastic surgeon.”

Samtang si Gimeno mibutyag nga kun sa Eleuteria usa siya ka inosente nga babayi, lahi ang makita karon sa publiko gumikan kay sa P usa siya ka “modern girl, raised by a modern family.”

Nasayran nga target ni Zuasola nga isalmot sa nagkadaiyang international film festivals ang “P.” Nasayran usab nga may Bisaya, Espanyol ug lumad nga lenggwahe sa Guam ang madungog dinhi niining maong pelikula. Giklaro usab ni Zuasola nga dili na sila mutuki sa pelikula kun diin gayud sa Visayas naggikan si Calungsod. “He is a Visayan, anha na lang kutob,” suma pa ni Zuasola.