Human sa eskandalo... bugalbugal!

CEBU, Philippines - Human sa hubo nga mga hulagway ni Prince Harry nga gipatik sa www.tmz.com sa milabay nga semana, gitanyagan matud pa ang anak ni Princess Diana nga magbida sa usa ka porn film.

Suma pa sa taho sa TMZ, ang Vivid Entertainment nagpadala og suwat didto sa Royal Palace sa London diin gidetalye ang tanyag para sa “party Prince.” Suma pa nga $10 million matud pa ang gitanyag aron mutando si Harry maoy magbida sa pelikula nga ‘The Trouble With Harry’ basi sa iyang mga hubo nga hulagway samtang nag-billiard didto sa Las Vegas kauban ang mga babayi.

Ang representante sa movie outfit nga si Steve Hirsch nagkanayon sa iyang suwat: ‘’We assure you the sex will be well-scripted, and the crown jewels will not be ‘minimized’ in any way.’’

Samtang gikatahong gidabudabuhan matud pa si Harry og kasaba sa iyang amahan nga si Prince Charles dungan sa sugo nga kinahanglang muhimo kini og public apology.

Usa ka tinubdan ang nagkanayon ngadto sa Radar Online: ‘’Harry regrets the embarrassment he has caused the royal family around the world and plans on apologizing for his antics.

Kahinumduman nga adtong 2005, mihimo pud og public apology ang prinsipe human siya mitambong og costume party nga nagsapot isip Nazi.

Dungan niini, gi-delete ni Prince Harry ang iyang Facebook account gumikan sa nahitabo. Samtang gibuwagan siya sa iyang uyab nga si Cressida Bonas, 23, kinsa nauwaw sa nahitabo ug napungot sa nakitang mga hulagway diin lain nga babayi ang kauban sa prinsipe.

P500K ni Freddie gikawat

Nakugang pag-ayo ang folk singer nga si Freddie Aguilar human gilungkab ang iyang balay sa Quezon City niadtong Domingo ug inside job ang usa sa gidudahan nga anggulo sa maong insidente.

Nasayran nga moabot ngadto sa $12,000 o dul-an sa P500,000 ang nasakiyo sa wala pa mailhi nga mga kawatan.

Matud pa sa singer nga giihap pa gani niya ang iyang kuwarta sa miaging adlaw ug gibutang niya kini sa safety vault busa nakugang na lang siya sa kalit nga pagkahanaw niini.

Base sa inisyal nga imbestigasyon sa Quezon City Police District Station 5, wala sila’y nakita nga force entry sa vault ni Freddie nga nagpasabot nga nasayod ang kawatan sa number combination aron maablihan ang maong vault.

Maja ug Gov. ER nagmadaugon sa Luna awards

Nagmaya pag-ayo ang aktres nga si Maja Salvador gumikan kay sa ikaduhang higayon, nakadaug na usab siya isip best actress.

Ang aktres maoy napili nga best actress sa gipahigayong 30th Luna Awards sa Quezon City niadtong Domingo sa gabii alang sa pelikula niya nga “Thelma.”

Nasayran nga susama kini nga award nga iyang nadawat sa Gawad Urian award kaniadto.

“Kung dati wala akong tiwala sa sarili ko, Direk Paul (Soriano) ikaw ang nagsabi sa akin na magaling ako,” tipik sa acceptance speech ni Maja

Nakuha na usab ni Laguna Governor Jeorge “E.R.” Ejercito ang best actor award alang sa action film niya nga “Manila Kingpin: The Asiong Salonga Story.”

Kompletong listahan sa mga mananaug sa 30th Luna Awards:

Best Picture: “Manila Kingpin: The Asiong Salonga Story”

Best Actress: Maja Salvador (“Thelma”)

Best Actor: Jeorge “E.R.” Ejercito (“Manila Kingpin”)

Best Supporting Actor: John Regala (“Manila Kingpin”)

Best Supporting Actress: Lovi Poe (“Yesterday, Today and Tomorrow”)

Best Director: Paul Soriano (“Thelma”)

Best Screenplay: Froilan Medina and Paul Soriano (“Thelma”)

Best Cinematography: Odessy Flores (“Thelma”)

Best Production Design: Fritz and Mona Silorio (“Manila Kingpin”)

Best Editing: Jason Cahapay and Ryan Orduna (“Manila Kingpin”)

Best Musical Score: Raul Mitra (“No Other Woman”)

Best Sound: Albert Michael Idioma (“Manila Kingpin”)

Special Awards:

Golden Reel Award: Rodolfo “Dolphy” Vera Quizon

FPJ Lifetime Achievement Award: Augusto Salvador

Manuel de Leon Award for Exemplary Achievement: Manuel “Jun” Urbano

Lamberto Avellana Memorial Award: Ben Feleo, Don Escudero ug Jose Batac