Basa nga ilok ug Fallen Hair

CEBU, Philippines - Maayong buntag gikan diri sa City of Golden Friendship, Cagayan De Oro! Ania ako karon kauban ang Kapuso Network para makigsaulog sa mga Kagay-anons sa Kagay-an Festival. Usa ka semana nga puno sa kalingawan among hatod diri. Mao na sa mga Kapuso namo diri, mag-kitakita ta!

Karon, magtubag ako sa mga pangutana ninyo. Naa na koy na pilian nga “Question of the Week.” Pero sa kataas sa akong tubag, sa musunod nga mga lindog na nako tubagon aron mapalawman nato ang pagtuki. Ngari una kita sa mga pangutana nga nakapa interes nako:

1. Good morning Ate Anna, Unsa nga hair treatment nga gamiton para dili na mag-fallen hair. Hellen Labao, Naga City, 16 yrs.old

Hi Helen! Pwede ka mogamit og tuno sa lubi sagulan og duga sa lemonsito ug e- apply kini sa imong buhok ilabina sa may anit. Pwede pod puro nga duga o gatas sa lubi ug imo kini ipahid sa imong anit ug buhok. Makatabang kini og pabaga ug paglikay sa falling hair. Pero mas epektibo gyud ang pagkaon og mga utanon kay kulang sa bitamina ang kasagarang hinungdan sa pagtaktak sa buhok.

2. Ang paghilak sa daghan tawo dili ba sad maayo? Kung nag simba ta, naigo ta sa homily sa pari naghilak ta dili ba sad maayong tan-awon? LunieVillagantol, Sibonga Cebu

hiLunie! Ang paghilak sa publiko dili bastos. Natural lamang kini ug dili kini malikayan. Kung ikaw naigo sa ebanghelyo sa pari sa simbahan ug natandog gyud imong kasingkasing, okay ra gyud nga makahilak ka. Ang dili maayo kanang naghilak unya nag- wild.

3. Good day Ms Anna. Ask ko if unsay mga tips aron makabaton og beauty and confidence like sa mga beauty queen, coz I like to join unta og mga pageant and modeling but I don’t know what to do. Thanks and more power. Im jen from Liloan, Cebu

Hi Jen! Ipadayon ang imong pagdamgo ug pagpaningkamot nga ikaw mahimong usa ka beauty queen. Ako nagsugod lang sad ko sa pag-api-apil og mga ginagmay nga pageants diri sa Cebu. Pero tungod sa akong pagsalig sa akong kaugalingon ug akong abilibad, nakatabang gyud ni sa pagtaas sa kumpiyansa nako sa akong kaugalingon. Ang pagtuo nimo sa imong mga mabuhat ug sa imong kaanyag ilabina sa imong kasingkasing mao ang usa sa mga daghan pang mga sekreto sa mga beauty queens. Nanghinaot ko nga sa sunod, ako kining mas hisgotan sa akong sunod nga lindog.

4. Morning ms. Ana. Ask lang unta ko bahin anang ilok nga magbasa kung unsay tambal. Basa gyud as in basa. Salamat. Berna Torrejos of Basak, Cebu City

Hi Berna! Normal ra man ang sington sa ilok, bisan ako nagproblema ana. Ang paggamit og “antiperspirant” usa sa mga solusyon. Naa kini kemikal nga makatabang sa pag-control sa singot sa ilok. Makatabang usab ang pagsul-ob og mga sanina nga ang panapton kay cotton, silk, linen, kanang makagin- hawa og tarong sa imong panit. Kung dili kini masulbad, kunsulta og doktor aron malamdagan ug matabangan ka.

Dili una mudawat si Anna og mga pangutana karong Domingoha gumikan kay tukion niya ang hisgutanan nga haduol kaayo sa iyang kasingkasing sunod Domingo: Unsaon nga mamahimong beauty queen ug model? 

Busa atangi ang maong hisgutanan, nga maglakip usab sa iyang personal nga kasinatian—sakripisyo, disiplina, determinasyon ug uban pa nga iyang naagian sa wala pa siya hingpit nga nahimong 2006 Bb. Pilipinas-World.