Daghang nag-ampo para kang Zsa Zsa

Manila, Philippines --- Mibuto ang balita kabahin sa sakit ni Zsa Zsa adtong gihandum ang 40th Day sa pagpanaw ni Mang Dolphy.

Bisan og nasayud na siya sa matang sa balatian nga anaa niya, mitambong gihapon si Zsa Zsa sa 40th Day Mass para kang Mang Dolphy nga gipahigayon didto sa usa ka simbahan sa California. Ang daughter ni Mang Dolphy nga si Kit ang nag-organize sa misa nga gitambongan sa ubang miyembro sa Quizon Family nga atua sa Amerika.

Wala itago ni Zsa Zsa ang iyang sakit ug nakatabang kini sanglit daghan ang nag-ampo aron mamaayo na siya.

Nalikayan pud ang mga speculation kabahin sa tinuod nga balatian niya sanglit dali niya nga giangkon ngadto sa publiko nga may kanser siya.

In fairness kang Zsa Zsa, dili siya makamao nga mulimod. Giangkon dayon niya ang mga isyu nga totoo gumikan kay walay rason nganong mamakak. Open book sa publiko ang kinabuhi ni Zsa Zsa hinungdan nga daghan ang midayeg niya.

Mga duha ka buwan ang pagbakasyon ni Zsa Zsa sa showbiz pero depende pa gihapon kini sa iyang resistensya human sa operasyon niya didto sa Amerika.

Sa kaso ni Zsa Zsa, murag dali ra ang iyang pagka-ayo. Positibo ang pagdawat niya sa bag-ong challenge sa iyang kinabuhi. Lig-on pud ang suporta ug paghigugma nga gibubu ngadto niya sa mga tawo nga nagpalibot kaniya.

Jacky naglikay og “scandal”

Ania sa Pilipinas ang Japanese actor ug producer nga si Jacky Woo gumikan kay gihimo niya ang pelikulang Death March.

Nangabang si Papa Jacky og usa ka warehouse ug dinhi nila gihimo ang mga eksena sa iyang pelikula.

Big project ang Death March gumikan kay mga popular actor ang co-stars ni Papa Jacky, sila si Sid Lucero, Sam Milby, Jason Abalos, Zanjoe Marudo etc.

Si Adolf B. Alix, Jr. ang direktor sa bag-ong project ni Papa Jacky nga padayong mitabang sa Philippine movie industry.

No comment si Papa Jacky basta pangutan-on kabahin sa iyang lovelife. Very secretive si Papa Jacky busa walay nasayud sa identity sa girl nga naghatag og kalipay niya.

"Scandal " ang consistent nga tubag ni Papa Jacky basta sukit-sukiton sa mga reporter ang iyang lovelife. Kontrobersyal ang buot pasabot ni Papa basta mutubag siya og scandal.

Murag teleserye

Daw teleserye nga ginuntan sa mga Pinoy ang pagpangita kang DILG Secretary Jesse Robredo.

Wala pa igkita si Sec. Robredo ug ang iyang duha ka mga kauban sa eroplano nga nag-crash sa kadagatan sa Masbate adtong Sabado. Lakip si P-Noy, miadto sa Masbate ug maoy nangulo sa pagpangita sa missing DILG secretary.

Nag-atang ang tanan sa mga news program sa TV ug naminaw sa radyo para sa latest update kabahin sa pagpangita kang Robredo.

Bakasyon usa Divine

Mibalibad si Divine Lee nga magpa-interview kabahin sa iyang tatay, ang Globe Asiatique owner nga si Delfin Lee nga missing pud gumikan sa mga kaso nga nalambigitan niini. Nagkaila kami kaniadto ni Delfin ug in fairness, buotan siya ug walay labad ikaistorya, pero nawad-an kami og communication dihang nag-boom ang iyang kompanya.

Si Divine ang nabuthan sa mga tawo nga naglagot sa iyang amahan gumikan kay makita man siya sa TV ug active sa Twitter. Makaayo nga mag-lie low usa si Divine samtang gipangita pa ang iyang amahan.