Host ng EB Indonesia nagpasiklab!

Bumisita kahapon sa Eat Bulaga sina Uya Kuya at Rian Ibram, ang mga host ng Eat Bulaga Indonesia.

Ibinalita ng dalawa na No. 1 na ang Eat Bulaga Indonesia sa afternoon timeslot at No. 1 sa lahat ng mga programa ng SCTV.

Hindi nagkamali ang SCTV management na bilihin ang franchise ng Eat Bulaga dahil numero uno kaagad sa Indonesia ang show kahit wala pa itong isang buwan sa ere. Hit na hit sa mga Indonesian ang Indonesian Pintar, ang counterpart ng Pinoy Henyo at ang ibang mga segment ng show.

Si Uya Kuya ang counterpart ni Vic Sotto sa Eat Bulaga Indonesia. Siya ang bossing ng grupo at bukod sa hosting, magaling na magician si Uya Kuya.

Nagpakita siya ng husay sa magic dahil naging pera ang tissue paper na hawak niya at sinindihan ni Rian.

Hit na hit sa mga Pinoy ang pagkanta nina Uya Kuya at Rian ng Dahil sa ‘Yo at Bahay Kubo. Nagpakitang gilas naman sina Bossing, Tito Sen at Papa Joey de Leon nang kantahin nila ang Bahasa version ng Bahay Kubo.

Naaliw ang mga Pinoy sa Indonesian hosts ng Eat Bulaga kaya nadagdagan ang fans nina Uya Kuya at Rian.

Alyssa binaha rin

Teary-eyed si Alyssa Alano dahil sa birthday greeting sa kanya ng Startalk. Kahapon ang 25th birthday ni Alyssa na na-touch ng husto dahil hindi nakalimot ang Startalk staff na batiin siya ng happy birthday.

Naging biktima ng baha si Alyssa nang manalanta si Ondoy sa Metro Manila noong Sept. 29, 2009. Binaha uli ang lugar na tinitirhan ni Alyssa dahil sa malakas na ulan noong nakaraang Martes. Ikinalungkot ni Alyssa ang kalamidad na naranasan pero nabawasan dahil sa birthday surprise ng Startalk.

Enzo may handog sa mga biktima ng habagat

Dedicated ni Enzo Pineda ang kanyang production number ngayon sa Party Pilipinas sa mga biktima ng baha.

Ngayon ang 22nd birthday ni Enzo at magkakaroon siya ng production number sa Sunday noontime show ng GMA 7.

Kikitain ng movie launching nina Elmo at Julie Ann ibabahagi sa Kapuso Foundation

Ibabahagi ng GMA Films sa Kapuso Foundation ang bahagi ng kikitain ng Just One Summer, ang launching movie ng love team nina Elmo Magalona at Julie Ann San Jose.

Bukas ang red carpet premiere ng Just One Summer sa SM Megamall Cinema 9 at sa Aug. 15 ang showing ng pelikula. Kung gustong makatulong ng fans nina Elmo at Julie Ann sa mga nasalanta ng baha, panoorin nila ang Just One Summer.

Zsa Zsa hindi nawawala ang sakit sa tagiliran

Bukas ang biyahe ni Zsa Zsa Padilla sa Amerika dahil doon niya patitingnan ang polyp na kasinglaki ng pingpong ball na tumubo sa loob ng kanyang katawan.

Hindi nawawala ang pananakit ng tagiliran ni Zsa Zsa kaya kokonsulta siya sa isang specialist sa California, USA.

Makakasama ni Zsa Zsa sa US trip niya si Dr. Vicki Belo na nag-convince sa kanya na magpa-check up sa ibang bansa.