Dahil hindi lahat ay nakapanood Smashing Pumpkins babalik ng PH
May message si Billy Corgan ng Smashing Pumpkins sa kanilang Filipino fans na hindi nakapanood ng concert nila sa Smart Araneta Coliseum last Wednesday, Aug. 8. Sabi nito: “For all the fans who CANNOT come tonight due to the weather we will come back again soon. We have been treated so well, and we thank you.”
Ang Snow Patrol ang sumunod sa Smashing Pumpkins na nag-concert, at this Friday, ang Tears for Fears. Sana wala nang ulan!
Dennis magiging asawa na si Marian
Matagal na naming na-blind item na pagtatambal nina Dennis Trillo at Marian Rivera sa Pinoy adaptation ng Korean novela na Temptation of Wife. Ang dalawa ang gaganap sa role nina Marcel at Angeline at ang nadinig naming napili sa role ni Heidi ay si Alessandra de Rossi.
Para sa role ni Nigel, ang magiging BF ni Angeline, ibibigay ito sa Kapamilya actor na lilipat sa GMA 7. Ang Temptation of Wife ang magiging first regular show ng actor dahil maggi-guest muna siya sa Aso ni San Roque.
Wala sa storycon ng Aso ni San Roque ang Kapamilya actor dahil that time, hindi pa nami-meet ang bossing ng Channel 7 at hindi pa nakakapirma ng kontrata. Kundi this week, next week ay tiyak na ang pagharap ng aktor sa management ng network at kasunod na nito ang pagpirma niya ng kontrata.
Nagkasama na sina Marian at Dennis sa Endless Love, ngayon lang sila magtatambal at mag-asawa pa ang role. Bida-kontrabida ang role rito ni Dennis, tiyak na kaiinisan siya ng viewers.
Sina Dennis at Alex ay nagkasama na rin pero ngayon lang sila magtatambal. Magandang abangan ang kanilang mga eksena at hintayin din natin ang iba pang bubuo ng cast at kung sino ang magiging director ng Temptation of Wife.
Kris nagpatulong kay Shalani
Namigay ng relief goods sa Valenzuela City kahapon si Kris Aquino. Kasama niya si Angel Locsin at sumama rin si Iza Calzado. Na-tweet nitong tineks niya si Shalani Soledad-Romulo at sinabing pupunta sila sa Valenzuela. Nagpasalamat daw ang ex-GF ng kapatid niyang si President Noynoy Aquino at nangakong tutulong.
“Looking forward to seeing her tomorrow,” tweet pa ni Kris tungkol kay Shalani.
Siyempre, mag-uusap din sila, but for sure, maliban sa sinabi nila on national TV at sa harap ng TV crew, hindi ipaaalam ni Kris ang napag-usapan nila ni Shalani.
Una nang pumunta si Kris sa Barangay Tunasan sa Muntinlupa para mag-distribute ng relief goods kasama si P-Noy.
Martin tinotoo na ang panliligaw kay Alex
Tama ba ang narinig naming nanliligaw na si Martin Escudero kay Alex Gonzaga na kapareha niya sa Enchanted Garden? Mas maganda raw ang samahan ngayon ng dalawa at kita ang kakaiba nilang closeness sa taping ng eco-serye ng TV5.
Unang nagkasama ang dalawa sa Babaeng Hampaslupa, that time kay Kean Cipriano pa nali-link si Alex, at si Martin sa ibang girl ang atensiyon.
Natatawa sila pareho noon ’pag tinutukso. Ngayon, na-realize yata ni Martin na type niya si Alex, kaya nanliligaw na raw. Sana, walang kumontra ’no?!
Samantala, masaya si Martin sa best actor nomination sa FAP Luna Awards para sa pelikulang Zoombadings : Patayin sa Syokot si Remington. Magagaling na aktor ang kasamang nominado ni Martin, kaya happy na itong maisama sa kanila.
Sophie ng aa anak ng mayaman
May mga kamag-anak na artista si Sophie Albert, ang 21-year-old Artista Academy hopeful. Pinsan niya si Tanya Garcia dahil ang dad ni Tanya ay kapatid ng mom niya. Sa father side naman niya, relatives nila ang mga Cojuangco, so, related siya kina Kris Aquino at Mikee Cojuangco.
Sa Wack Wack sa Mandaluyong City nakatira si Sophie, malapit sa bahay nina Sen. Kiko Pangilinan at Sharon Cuneta, pero sa lola raw niya ’yun at nakikitira lang sila. Nag-describe pa ito kung gaano kalayo ang bahay nila kina Mega.
Comatose ang daddy ni Sophie mula pa noong 2000 pero kinukuwentuhan niya ng mga nangyayari sa kanya. Natutuwa raw ito na nakapasok siya sa AA dahil alam na matagal na niyang gustong mag-artista.
- Latest
