Jeepney Ride

CEBU, Philippines - Apas sumpay ni sa atong mga nahaunang column kabahin sa atong mga kasinatian matag sakay sa pampublikong sakyanan. Naa lang koy tulo ka additional nga para nako angayan natong likayan samtang musukay kita og jeep. Humana kita og hisgot kabahin sa mga driver nga dugay kaayo mularga kay manilok gyud og pasahero unya inig sa unahan labihan na hinuon kadaghan nga pasahero ang nagpaabot, wala nay bakante. Naghisgot na pud kita anang mga pasahero magtanga lang, dili gyud musibog bisag nagkalisud pa kita sa atong pagsakay. Nakapalagot na pud nato kanang mga manag-uyab nga mag-PDA (public display of affection) sa sulod sa sakyanan, buntag man nga dako o gabii nga matugnaw.

But life goes on and on, the cycle continues. Duna na pud koy dugang pa nga mga nabantayan nga angayan natong likayan samtang magsakay og jeep.

Una, kana bitaw’ng magsakay kita og jeep, unya kalit nga may manawag sa atong cellphone, unya atong tubagon, unya perte natong dakoa og tingog mura’g kita ray pasahero, unya atong mga katupad mi-iknat na ang mga kilay. Unya magkatawa-katawa pa gyud kita samtang nakigsulti sa nanawag nato, bahala’g gisigahan na nato sa mata. Ka makalagot gyud ana uy, walay kaikog sa kasakay. Tinuod, pampubliko na sakyanan, pero dili man siguro nato ikamatay kun magbaton kita og gamay nga respeto sa atong mga kasakay. Pakkk!

Ikaduha, kana bitaw’ng mga babayi nga pasahero nga mga tag-as og buhok nga bisan uga na, ipadunghay lang. O lagi inyo lagi nang buhok ug walay but-anay. Pero nakahibawo ba mo nga kun kusog na kaayo ang dagan sa jeep, mulupad inyong buhok ug muhampak sa nawong sa kasakay, sakit kaayo? Usahay, kay taas man, sa baba sa imong kasakay musulod. Bangani or pangkua pud tawon na inyong buhok, gawas nga dili kamo makadisturbo sa inyong kasakay, mas gwapa man mo tan-awon kun hipos inyong mga buhok samtang magsakay og jeep. Lagi, sanag inyong mga dagway kun walay buhok nga maglupad-lupad samtang naa sa jeep.

Ikatulo, makalagot kaayo nang magsakay og jeep nga magtanga lang uy, mutunol ta og plite di gyud mudawat, magsiga lang ang mata---maayo kaayong tusukon. Kinahanglan pa nga mutaas imong tingog aron lang gyud itunol imong plite ngadto sa driver. Kasagaran ani kanang mga manag-uyab nga magparayeg-parayeg sa usa’g-usa, bisan naas jeep. Manag-uyab man ug dili, dawata na ninyo ang plite uy, ilabi na og namalihug. Kamo pud muplite pamalihug pud mo ug pagpasalamat kun natunol na inyong plite, kay mao nay sakto nga buhaton sa mga tawo nga may breeding. Awww. Mao ra na dear okRYANians!

Reaksyon o opinion? Text me pinaagi sa:0939-131-6599. Kinahanglan nga dunay ngalan ug address ang mensahe, ug labaw sa tanan kabahin kini sa unsay gituki karong adlawa, dili pwede ug ayaw paghimo og laing topic. Plus, kung makig-text mi ra ka, ayaw na lang og text—wa koy panahon ana. Pakkk! Kutob lang karong ala una sa hapon, (1pm, August 9) ang pagdawat nato sa inyong mga reaksyon. Busa, text text text na!

Magdungog gihapon ta pinaagi sa dyRC 648 Khz, 10 a.m. to 12n---Lunes hangtud Sabado. Bisitaha mi sa www.dyrc-cebu.com. Pangitaa ko sa Facebook: [email protected]