Pirmahan ng kontrata para sa Indio ni Bong naudlot dahil sa baha; Zsa Ssa hindi nakakanta, iyak nang iyak lang sa tribute kay Dolphy

PIK : Na-postpone ang contract-signing event ni Sen. Bong Revilla, Jr. sa GMA 7 kahapon dahil sa patuloy na pananalasa ng malakas na ulan.          

Ang daming lugar ang binaha kaya suspended na rin ang pasok sa GMA 7. Wala pang napagdesis­yunan kung kailan itutuloy ang contract-signing ni Sen. Bong sa Kapuso Network.

Pinaghahandaan na ng GMA 7 ang bagong epic serye na pagbibidahan niya na may tentative title na Indio.

Ang dinig namin, pinagpipilian pa kung kanino kina Jennylyn Mercado at Rhian Ramos ang kukuning leading lady ni Sen. Bong.

PAK : Apektado rin ang taping at shooting kahapon dahil sa lakas ng ulan at taas ng baha.

Hindi natuloy ang taping ng karamihang drama series at na-postpone rin ang shooting ng Si Agimat, si Enteng Kabisote at si Ako sa Tanay, Rizal.

Nabalitaan din naming pinasok na ng baha ang tahanan nina Sylvia Sanchez at Nadia Montenegro.

Napilitan sina Nadia na mag-evacuate at nag-check-in sa hotel dahil sa patuloy na pagtaas ng tubig.

Nakaka-text ko si Gladys Reyes, nasa garahe na raw nila ang tubig pero mabuti’t tumitigil-tigil ang ulan kaya bumababa naman.

Patuloy ang panalangin ng lahat na sana tumigil na ang malakas na ulan dahil matinding trauma na nga ang inabot ng bagyong Ondoy, eto at masusundan na naman ngayon.

BOOM : Napag-alamang na-pack up ang taping ng Dolphy Special sa ABS-CBN 2 dahil sa iyak nang iyak na lang si Zsa Zsa Padilla.

Kung hindi kami nagkamali, ito ’yung isa sa pinaghahandaan para sa 40th day ng kamatayan ni Mang Dolphy sa Aug. 18.

Pero hindi na nakakanta si Zsa Zsa dahil sa iyak na lang nga nang iyak. Nakakanta pa raw ang anak na si Zia Quizon pero si Zsa Zsa ay umuwi na lang dahil sobrang emotional na.

Malaking paghahanda itong Dolphy Special na ang pagkakaalam namin, magsasanib dito ang GMA 7, ABS-CBN 2, at TV5.