Tiffany

CEBU, Philippines - Mohisgot sa dagan sa fashion, mga inspirasyonal nga istorya sa mga nagkadaiyang personalidad ug ang swak karon sa mga kabatan-onan.

Kini maoy ipakita ug tukion sa bag-ong talk show nga ginama sa SHE Production Inc. ug makita sa CCTN-47 matag Sabado sa alas 6 sa gabii, nga nag-ulohan og “Tiffany.”

Ang host niini mao ang 21 anyos nga si Tiffany Joy Ochoa, kinsa kasamtangang nagtungha sa kursong BS Medical Technology sa Velez College.

Wala damha ni Tiffany nga mahimong usa ka TV host sanglit mauwawon siya nga pagkatawo hangtud nga nakumbinser gyud siya sa iyang uyuan nga si Archie Modequillo kinsa mao usab ang direktor sa maong youth- oriented talk show.

Ang inahan ni Tiffany nga si Susan Henry maoy nag-produce sa maong show pinaagi sa iyang SHE Production Inc.

Giingong nahulma ang maong show sanglit bata pa lang ang inahan ni Tiffany, ganahan na kini nga magmugna og TV production.

Aminado si Tiffany nga dili siya perpekto busa iyang giangkon nga dunay mga higayon nga kasab-an siya sa direktor apan nasayod siya, nga alang ra kini sa iyang kaayohan aron mahimo siya nga maayong TV host.

Gawas sa paghisgot og fashion ug uban pa nga mga importante nga topic, ipakita usab ni Tiffany ang iyang pagkamahiligon sa mga charity works.

Matud pa niya nga ganahan siya nga mohimo og mga butang nga gibuhat sa iyang mga ginikanan sama sa mga feeding program ug ang pag-apod apod og mga school supplies sa mga kabos nga tinun-an sa elementary sa usa sa mga dapit sa probinsya.

Sama sa iyang inahan, ganahan si Tiffany nga makapaambit sa nadawat niya nga grasya. Ang inahan ni Tiffany nanag-iya og tulo ka mga nursing home didto sa Amerika kung diin ang 80% sa 400 kapin ka mga empleyado niini  puros Pinoy.

Gawas sa mga  interbiyohon ni Tiffany, aduna pu’y mga higayon nga mopakita sa ilang talent sa maong programa ang mga local performers.

Sa dihang gilusad ang  programa ni Tiffany niadtong Sabado diha sa Ayala Center-Cebu, nahimo niya nga special guests ang kanhi finalist sa Pilipinas Got Talent nga si Julius The Violinist ug ang Sinulog Idol  2012 winner nga si  Ronna Jenn Lofranco .

Giingong mahinhin nga pagkatawo si Tiffany apan gumikan sa mga workshops ni Direk Archie, nakat-on na siya sa pag-atubang og camera.

Matud pa nga sa dihang gihimo ang pictorial alang sa maong show, nasugdan kini og dul-an sa usa ka oras nga paghinuwat sanglit niadtong higayona, dili siya komportable nga magpahulagway ilabi nga dunay daghang tawo nga nagtan-aw kaniya.

Panghinaut ni Tiffany nga hangpon sa mga Sugbuanon ang iyang show, kung diin duna pud siya’y guest co-host sa matag episode.