Dili makalimtan nga proyekto

 Manila, Philippines --- Malipayong gipahibawo ni Geoff Eigenmann nga kumportabli na siya nga ka-eksena ang iyang amahan nga si Michael de Mesa sa Kasalanan Bang Ibigin Ka. Sa sinugdanan, wala matago ni Geoff nga makuyawan siya kun ang iyang papa maoy iyang ka-eksena ug maglisud pa siya og litok sa iyang mga lines. Pero karon naanad na si Geoff kay suportado matud pa siya sa iyang amahan ilabi na sa mga bug-at nga eksena. Misamot pa kabug-at ang mga drama nilang eksena, diin may eksena pa nga gipakulata siya ni Michael. Busa dili gyud makalimtan ni Geoff  ang afternoon drama niya karon sanglit daghan siya og nakat-unan gikan sa iyang amahan.

Walay hilabtanay basta gugmahay

Gihimakak ni Alden Richards ang intrigang mas type siya sa inahan ni Louise delos Reyes nga  mauyab sa anak niini.  “Baka nahu-hook lang po si Mommy sa One True Love,” nagkatawang pamahayag ni Alden. Sa hisgutanan sa lovelife ni Louise dili gyud matud pa manghilabot si Alden sanglit nasayud siya kinsay gihigugma sa dalaga. Pero kung sa One True Love na gani, siyempre in love na in love sila sa usa’g-usa.

Zsa Zsa may sakit

Wala makatambong si Zsa Zsa Padilla sa pa-dinner nga gipasiugdahan ni  Willie Revillame adtong milabay nga adlaw para sa birthday ni Dolphy. Suma pa ni Eric Quizon medyo nagsakit matud pa ang tuhod ni Zsa Zsa hasta ang anak niini nga si Zia. Mitambong hinuon ang ubang mga anak ni Dolphy sa pa-dinner ni Willie para sa birthday ni Dolphy nga gipahigayon didto sa Wil’s Place sa Quezon City. Didto nasagap namo nga gihisgutan nila ni Eric ug mga kahigalaan kung unsay mahitabo sa umaabot nga  40 days sa  kamatayon ni Dolphy. “Kapag naayos na lahat, i-announce ko rin sa inyo. Maganda ito, dahil dito magsama-sama na naman at magkaisa uli ang mga malalaking TV network, ang ABS-CBN 2, GMA 7 at TV 5,” nagkanayon ang actor/director.