Dionne nahugyaw sa resulta sa survey

CEBU, Philippines - Naghudyaka pag-ayo ang Sugbuanong aktres nga si Dionne Monsanto gumikan sa mga positibong feedback sa serye nga Be Careful With My Heart kung diin nalakip siya niini.

“Happy kay ko ug wala ko kasabot sa akong feeling karong panahona, salamat gyud kaayo sa tanang nanan-aw sa Be Careful With My Heart,” tsika pa ni Dionne sa dihang nahinabi sa Banat News Hugyaw kagahapon pinaagi sa telepono.

Matud pa ni Dionne nga lingaw kaayo ang maong serye ug miresulta gyud ang ilang kahago sa taping.

Wala panumbalinga ni Dionne ang kakapoy ilabi na nga kanunay nga nag-una sa nationwide survey ang maong serye.

Kahinumduman nga nag-una kini sa daytime race sa Kantar Media-TNS Total Philippines Household Ratings niadtong Lunes, Hunyo 23.

Atol sa nahisgutang petsa ang Be Careful With My Heart mikulit og 20.2%, samtang ang kaatbang niini nga Kapuso Movie Festival: Kapag Tumibok Ang Puso nakakuha lang og 9.8%.

Dugang pa ni Dionne nga gumikan sa kalampusan sa maong serye, kanunay siya ganado sa pagtambong sa taping.

Gidala ni Dionne ang role nga Teacher Emmy, siya ang maestra sa anak ni Richard Lim (Richard Yap).

“Challenging kaayo ang akong role. Permi nako minalditahan si Maya (Jodi Sta. Maria). When we do our scenes, effort gyud kaayo ko kay light kaayo ang atmosphere ani nga set. Happy kaayo mi tanan sa set,” panapos pa ni Dionne. (BANAT NEWS)