Vanessa mag-artista na

CEBU, Philippines - Kapatid na ang Sugbuanon ug Miss World Philippines 2nd Princess, Vanessa Amman, diin mipirma siya og usa ka tuig ug tunga nga kontrata sa TV5, diin hosting project ug usa ka pelikula ang nagpaabot niya.

Mao kini ang gibutyag ni Vanessa sa iyang pagbisita sa Cebu City Hall kagahapon sa udto, diin gikagubtan siya og maayo sa mga kawani ug giabi-abi ni Mayor Michael Rama. Si Vanessa, kanhi Miss Cebu 2011 2nd Runner-Up.

Suma pa niya gipaubos siya karon sa TV5 og nagkadaiyang workshops, ilabi na sa pagsulti og Tagalog aron mahatagan gayud siya og proyekto.

“Kinahanglan gyud nga magkat-on ko og Tagalog para makadawat ko og projects. Excited na kaayo ko,” suma pa ni Vanessa.

Ang hingpit na niya nga pagsulod sa showbiz, usa ka lakang nga gituki og maayo sa ilang pamilya, ug sanglit mipirma na siya og kontrata, tataw nga nagpaluyo gayud niya ang suporta sa iyang mga mahal sa kinabuhi. Si Vanessa, anak ni Lapu-Lapu City Councilor Queenie Amman, nga kanhi usab supermodel.

“Kung mosulod man gud ka sa showbiz, adunay times nga imong private life mahibaw-an sa tanan, seguro mao na usa sa akong bantayan. Pero madala naman seguro nako, haha,” nagkanayon si Vanessa ngadto sa mga tigbalita.

Ganahan kaayo siya nga malakip sa usa ka proyekto nga kumbinasyon sa drama ug comedy. Gibutyag niya nga ang pelikula nga nalakip sa iyang kontrata, ubos sa movie outfit sa TV5.

Samtang giangkon ni Vanessa nga laraw gayud unta niya nga musalmot sa Bb. Pilipinas, apan miatras siya sanglit gitambagan siya nga ipa-straight ang iyang buhok.

“Wala ko mosugot kay ipa-straight nila akong buhok, proud naman ko sa natural nako nga beauty,” niya pa.