Doktora Belo naka-move on na!

Ibang Dr. Vicki Belo ang nakita namin sa presscon niya kasama ang anak na si Cristalle at ang sinasabing bagong apple of the eye ni Vicki na si Al Galang. Ipinaliwanag sa presscon ang sariling app (application) ng Belo Medical Group na available na sa Mac App Store noong June 19.

Naka-move on na ang celebrity doctor sa kanyang pakikipagrelasyon kay Hayden Kho, Jr. at mas masaya ngayon sa kanyang buhay. Itinatwa nito na may namumuong relasyon sa kanila ng yoga instructor na si Al.

Sa kabilang banda, tawa kami nang tawa nang biruin si Manay Lolit Solis na kaya siya magpapa-stem cell procedure (courtesy of Dr. Belo) ay hindi para bumata kundi para magamot ang mga sakit niya gaya ng diabetes at iba pa.

New Wave section ng MMFF pabobonggahin

Ang taong 2010 ay memorable para sa Metro Manila Film Festival (MMFF) nang isagawa ang Tribute to Independent Cinema, isang non-competitive event para sa independent genre kung saan hindi naglaon ay tinawag itong New Wave. Limang independent films ang sinuri sa Robinsons Movieworld para sa pagbubukas ng MMFF noong December 2010.

Noong 2011, nagsilbing inspirasyon para kay Metropolitan Manila Development Authority (MMDA) Chairman Francis Tolentino ang patuloy na popularidad ng independent films sa bansa kaya sinabing susuportahan niya ang nasabing genre at ipinahayag ang pagdaragdag ng New Wave section para mapalawak pa ang scope ng December filmfest. Isinali rin nila ang subsection para sa mga baguhang estudyante na tinawag na Student’s Short Film. Ang pamosong direktor na si Mark Meily ang nag-facilitate ng bagong section at bumuo ng mga awards gaya ng best film, best director, best actor, at actress.

Mas pinabongga ngayong taon, ipagpapatuloy ng MMFF ang pagsuporta sa independent films dahil mas palalakihin ang New Wave section.

Ayon kay Ms. Digna Santiago, isa sa moving spirit ng MMFF executive committee, mas lalong pasisiglahin ang New Wave Section Award sa taong ito dahil sa nagdagdag sila ng mga papremyo sa mananalong best picture, best director, best actress, at best actor gayundin ang venue.

Ang masayang balita, ayon pa kay MMDA Chairman Tolentino, ang manalong best picture natin ay isasali sa ibang competition sa abroad gaya sa Tokyo, Japan at iba pa para maipalabas ito sa ibang bansa.